Laqgħa li trattat l-opportunitajiet u l-isfidi għad-djalogu soċjali f’Malta u fl-Ewropa kienet parti minn proġett konġunt ikkordinat mill-Kumitat tal-Edukazzjoni fi ħdan it-Trade Unions Ewropej (ETUCE) u l-Federazzjoni Ewropea ta’ Min Iħaddem fil-qasam tal-Edukazzjoni (EFEE), bi sħab ma’ entitajiet edukattivi fid-Danimarka, fil-Fillandja, fl-Irlanda, fl-Italja, fil-Lussemburgu, fl-Olanda, fil-Portugall u f’Malta.
F’isem l-Edukaturi Maltin attendew l-Uffiċjali tal-Union tal-Għalliema (MUT), li hi waħda mis-sħab. Il-proġett għandu l-għan li jtejjeb il-proċessi tad-djalogu soċjali u l-kapaċitajiet tal-imsieħba soċjali li japplikaw koperazzjoni kulturali, fost l-oħrajn.
Fl-intervent tiegħu, il-President tal-MUT Marco Bonnici tkellem dwar il-forom differenti tad-djalogu soċjali li l-Union żammet f’diversi fora f’pajjiżna u barra. Fakkar fid-diversi kwistjonijiet li l-MUT issib ma’ wiċċha, fosthom il-ġlieda kontinwa għall-aħjar kundizzjonijiet għall-membri tagħha.
Min-naħa tagħhom, Paola Camilli f’isem l-ETUCE u Daniel Wisniewski f’isem l-EFEE qalu li jinsabu lesti jsegwu dak kollu possibbli li għaddej f’Malta u f’pajjiżi oħrajn ħalli jaraw li jittieħdu d-deċiżjonijiet meħtieġa fuq livell Ewropew. Sostnew li sfortunatament, il-livell ta’ djalogu soċjali fl-Edukazzjoni fl-Ewropa mhux wieħed stabbli biżżejjed, għalkemm jirrikonoxxu dak li hemm bżonn isir biex jitjieb.
Kelliema oħra matul il-laqgħa inkludew rappreżentanti oħra mill-ETUCE u l-EFEE, rappreżentanti mill-ICF International, imsieħba soċjali mill-Greċja, kif ukoll kelliema minn Direttorati differenti fil-Ministeru tal-Edukazzjoni, mill-Istitut tal-Edukazzjoni, mill-Iskejjel tal-Knisja u Indipendenti u minn setturi fi ħdan tradeunions diversi.
