Raġel li l-identità tiegħu għad mhix magħrufa seraq mijiet ta’ ewro fi flus mill-cash register tal-bar tal-każin tas-Soċjetà Mużikali ta’ Sant’Antnin f’Birkirkara.
Il-każ seħħ nhar it-Tlieta li għadda, ftit qabel is-sagħtejn ta’ filgħodu, meta r-raġel jidher jaqbeż minn fuq il-bar tal-każin, jiftaħ il-cash register u jieħu dak kollu li jiflaħ fl-iqsar ħin possibbli.
Malli ħataf il-karti tal-flus u kemm felaħ muniti, hu jaqbeż mill-ġdid għas-sala tal-każin, b’ħeffa liema bħala jaqbeż għal fuq mejda u joħroġ mit-tieqa tal-każin.
Dwar dan il-każ sar rapport fl-għassa tal-Pulizija ta’ Birkirkara, bil-Pulizija li qed tinvestiga wkoll il-filmati mill-kameras tas-sigurtà. Min jagħraf lil dan ir-raġel qed jintalab jgħaddi l-informazzjoni, anke jekk b’mod anonimu.
