Raġel inqabad minn kameras tas-sigurtà jisraq laptop, apparat ta’ kumpanija lokali kif ukoll xi dokumenti minn vann ta’ impjegat li kien fuq xogħol fiTriq il-Wied, f’Birkirkara.
Il-każ seħħ il-Ħamis, ftit qabel il-11:00 meta l-impjegat kien qed jgħabbi xi affarijiet fil-vann tax-xogħol.
Jirriżulta li l-ħalliel kien qed josserva lill-impjegat, u ħataf l-okkażjoni hekk kif daħal fuq ġewwa tal-istabbiliment biex joħroġ sellum u jgħabbieh fil-vann. Kien hawn li fetaħ il-vann, li ma ssakkarx mill-impjegat għaliex kien se joħroġ mgħobbi, u ħa dak kollu li sab.
Il-laptop li nsteraq kien dak personali tal-impjegat, għalkemm fuqu kellu wkoll xi informazzjoni relatata max-xogħol. Madankollu kemm id-dokumenti u l-apparat l-ieħor misruq hu pjuttost bla użu għal min serqu u allura mhux eskluż li ntremew mill-ħalliel.
Dwar dan il-każ sar rapport fl-Għassa ta’ Birkirkara, bil-pulizija li qed janalizzaw ukoll il-filmati tal-kameras tas-sigurtà fiż-żona. Min għandu xi informazzjoni jista’ jgħaddha lill-Pulizija, inkella lil dan l-istazzjon, dejjem b’kunfidenzjalità.
