Lokali

Kumpanija lokali sospiża wara akkużi li ttallbu għal reviews pożittivi

Il-kumpanija Insel Games, reġistrata f’pajjiżna u li topera minn uffiċċji f’San Ġwann, kellha l-kontijiet tagħha fuq Steam sospiżi fuq akkużi li d-diriġenti talbu lil diversi persuni biex jiktbulhom analiżi (reviews) favorevoli dwar il-logħob li jipproduċu.

Steam hi pjattaforma onlajn fejn wieħed jista’ jixtri jew iniżżel diversi logħob, użata wkoll biex wieħed jilgħab logħob u jikkompeti ma’ oħrajn onlajn.

L-azzjoni ttieħdet wara li ġie ppubblikat imejl li kien qed jibgħat il-Kap Eżekuttiv tal-kumpanija, Patrick Streppel, fejn jitlob reviews pożittivi mingħand l-impjegati tiegħu għaliex jgħid li l-prestazzjoni tal-logħob tal-kumpanija ma kinitx waħda tajba.

Mhux hekk biss iżda Streppel saħansitra jhedded lill-impjegati li jew jixtru l-logħba u jiktbu reviews pożittivi, inkella l-kumpanija tfalli u sas-sena d-dieħla jispiċċaw bla xogħol. Iwissi lill-impjegati li jekk ma jagħmlux dan, huma jiġu msejħa għal laqgħa miegħu.