OLANDA………….12
MALTA…………….8
(4-1), (2-2), (4-4), (2-1)
It-tim nazzjonali Malti sofra t-tieni telfa fil-LEN Europa Cup din id-darba b’telfa ta’ 12-8 kontra Olanda. Minkejja t-telfa, dan hu riżultat li jagħmel ta’ kuraġġ kontra tim aktar kwotat. Ftit sigħat wara logħba diffiċli kontra s-Serbja, it-tim ta’ Karl Izzo rnexxielu jibqa’ fil-logħba għal maġġoranza tal-logħba, b’sitta mill-gowls jaslu wara li kienu skorjaw l-Olanda.
L-aħjar sessjoni kienet it-tielet waħda, mhux biss għaliex ġew skorjati erba’ gowls, iżda l-gowls waslu wara gowls tal-Olanda, b’żewġ gowls jaslu minn sitwazzjoni ta’ man-up.
Bidu tajjeb mill-Olandiżi li marru 2-0 minn fuq b’doppjetta ta’ Jorn Winkelhorst wara minuta u 11-il sekonda mill-ftuħ. Dino Zammit naqqas id-distakk lejn nofs is-sessjoni, iżda fl-attakk sussegwenti l-Olanda għamluhom 3-1 biex Koopman skorja r-raba’ gowl tal-Olanda.
L-Olandiżi dehru li setgħu jiddominaw il-logħba meta fetħu vantaġġ ta’ ħames gowls, iżda gowls minn Aurelien Cousin u Stevie Camilleri żammew id-distakk ta’ tliet gowls fi tmiem it-tieni sessjoni.
Botta u risposta kkaratterizzat it-tielet sessjoni bl-Olanda jippruvaw jaħarbu bil-logħba iżda t-tim Malti wieġeb dejjem fl-erba’ okkażjonijiet li l-avversarji skorjaw, bl-Olanda jibqgħu tliet gowls vantaġġ.
L-aħħar sessjoni kienet aktar movimentata, hekk kif kien hemm esklużjoni doppja filwaqt li t-tnejn kellhom tliet tentattivi ta’ raġel aktar. Robin Lindhout għamel l-iskor 11-7 fl-ewwel parti tas-sessjoni u prattikament għalaq il-logħba. Sam Van der Burg għamilhom 12-7 bi 15-il sekonda għat-tmiem, iżda Ben Plumpton irnexxielu jiskorja b’sitt sekondi għat-tmiem.
Malta tielet il-logħba minn dan il-grupp għada fil-5.30pm kontra l-Greċja u tagħlaq l-impenji fil-grupp l-Ħadd fil-11.30am kontra l-Kroazja.
Olanda: E. Wagenaar, R. Van der Horst, J. Winkelhorst (2), S. Van der Burg (1), L. Reuten, R. Lindhout (3), B. Hoepelman (1), G. Van Ijperen (2), H. Muller, K. Veenhuis (1), J. Koopman (2), T. Lucas, M. De Koff
Malta: N. Grixti, N. Bugelli, A. Galea, D. Zammit, J. Abela, M. Zammit (1), S. Camilleri (4), J. Camilleri, B. Plumpton (1), A. Cousin (1), Z. Mizzi, D. Zammit (1), J. Tanti
Referees: Zsolt Maryaj (Ungerija), Adrian Alexandrescu (Rumanija)
