Ftit tal-ħin ilu bdew jitneħħew numru ta’ billboards fin-naħa ta’ fuq ta’ Malta bħala parti minn eżerċizzju tal-Awtorità tal-Ippjanar li qed tieħu azzjoni fuq dawk li ġew individwati bħala illegali.
Fost dawk li qed jitneħħew hemm billboards li matul il-lejl li għadda ttellgħu madwar pajjiżna u li jwasslu messaġġ favur ġustizzja dwar l-assassinju tal-ġurnalista Daphne Caruana Galizia.
F’xi każi, bħalma jidher fir-ritratti li akkwista dan l-istazzjon minn St. Andrew’s, l-azzjoni ta’ infurzar wasslet ukoll għal konġestjoni tat-traffiku hekk kif kien hemm bżonn l-użu ta’ diversi inġenji, fosthom krejn.
Dan l-iżvilupp iseħħ fl-istess waqt li numru kbir ta’ nies kienu qed jinġabru quddiem il-Qorti fejn saret velja għal ġurnalista Daphne Caruana Galizia li ġiet assassinata erba’ xhur mil-lum.
