Investigazzjoni fl-Italja wasslet biex sar magħruf li kont bankarju rreġistrat f’Malta, taħt isem il-kumpanija Maltija Investement Ltd., kien qed jintuza biex jingħataw flus lill-maġistrati f’Sirakuża għal skop ta’ korruzzjoni.
L-investigazzjoni, li qed titmexxa’ mill-Prokuri ta’ Messina u Ruma, żvelaw metodu ta’ korruzzjoni kapaċi li jikkundizzjona l-eżitu ta’ diversi sentenzi, bl-avukati Piero Amara u Giuseppe Calafiore (ritratt) li kienu jieħdu ħsieb ir-rapporti bejn l-esponenti tal-maġistratura, tal-penali u l-amministrattiv.
Minbarra flus, jirriżulta li kienu jgawdu wkoll minn vantaġġi ekonomiċi bħala tpattija tal-favuri li jkunu għamlu.
Fost dawk akkużati b’korruzzjoni hemm il-maġistrat Riccardo Virgilio, President tal-Kunsill tal-Istat li ilu minn Jannar tal-2016 li rtira. Instab li hu kien parti minn triangolazzjoni finanzjarja li kienet tinvolvi wkoll lill-Iżvizzera, minbarra pajjiżna.
Dan hekk kif fit-2 ta’ Diċembru tal-2014, minn kont bankarju Żvizzeru għaddiet somma ta’ iktar minn €750,000 lil Investement Ltd. f’pajjiżna, liema somma nżammet moħbija mill-uffiċjali tat-taxxa fl-Italja.
