L-Avukat Ġenerali Libjan ħareġ mandati ta’ arrest fil-konfront ta’ 144 persuni akkużati b’involviment fil-kutrabandu ta’ fuel mill-Punent tal-pajjiż.
Il-Kumpanija Nazzjonali taż-Żejt tal-Libja ikkonfermat li l-Avukat Ġenerali ħareġ dawn il-mandati ta’ arrest.
Fi stqarrija, il-Kumpanija nazzjonali qed tappoġġja din il-ħidma kontra l-pjaga tal-kutrabandu biex il-poplu Libjan ikun salvagwardjat mill-azzjonijiet ta’ kriminali u ħallelin. Mhux magħruf jekk hemmx Maltin fost il-persuni msemmija fil-mandati ta’ arrest.
Din l-azzjoni hi waħda minn sensiela ta’ investigazzjonijiet dwar kutrabandu ta’ fuels mill-Libja lejn Malta u l-Italja, b’pajjiżna jissemma’ ħafna drabi bħala ħolqa importanti f’dan il-kutrabandu.
Minbarra fil-Libja, anki l-awtoritajiet Taljani qed jinvestigaw il-kutrabandu mill-Libja u rabtiet Maltin f’din l-intrapriża kriminali.
F’Ottubru li għadda, l-awtoritajiet Taljani arrestaw lil Darren Debono, eks plejer internazzjonali tal-football akkużat fost oħrajn li kien f’ċirku ta’ kutrabandu ta’ diesel u fuel ieħor mill-Libja.
Gazzetta Taljana, il Sole 24 ore, saħansitra ikkwotat sorsi fi ħdan il Guardia di Finanza Taljana li kienu jafu b’mill inqas f’okkażjoni waħda fejn Debono kellu laqgħa fil-Ministeru tal-Affarijiet Barranin f’Malta
Hu stmat li f’dawn l-aħħar erba’ snin, il-Libja tilfet mal-140 biljun dollaru minħabba kutrabandu u għeluq ta’ portijiet u raffineriji fil-punent tal-pajjiż.
