Il-problemi fil-qasam tas-Saħħa Mentali, il-privatizazzjoni tal-isptar Karin Grech, l-isptar San Luqa u l-isptar Ġenerali ta’Għawdex ma kinux parti mid-diskors li għamel l-Ħadd filgħodu l-mexxej Laburista Joseph Muscat, fil-każin Laburista ta’ Ħal Qormi.
Fl-aħħar jiem persuna rikoverata l-isptar Monte Carmeli ħarbet u wara kien instab mejjet f’lukanda Bugibba. Dan minbarra li l-ġimgħa li għaddiet ġew fl-idejn numru ta’ pazjenti tal-istess sptar, bl-infermiera u l-carers qabdu u ħarġu mis-swali b’sinjal ta’ protesta, sakemm il-management ordnalhom biex jidħlu ġewwa minnufih u bil-Kap Eżekuttiv ta’ Monte Carmeli ma joħroġ l-ebda stqarrija dwar is-sitwazzjoni diżastruża li qed jgħixu fiha l-pazjenti u li qed jaħdmu fiha il-ħaddiema.
Iżda l-mexxej Laburista Joseph Muscat, f’Ħal Qormi, ma tkellem xejn dwar dan kollu.
Tkellem imbgħad dwar l-isptarijiet li għaddihom għal għand Vitals Global Healthcare u li issa dawn se jgħaddu għal għand Steward Healthcare, b’Joseph Muscat jgħid li l-unika soluzzjoni għal dawn it-tlett sptarijiet m’hix li jinvesti fihom imma li jgħaddihom għand il-privat.
Il-Kumpanija li issa se tmexxi l-isptarijiet Karin Grech, San Luqa u l-isptar ġenerali ta’ Għawdex, Steward Healthcare hi kumpanija Amerikana mgħarufa li tixtri sptarijiet li tħallew ifallu jew fallew u tbiddilhom fi sptarijiet li tagħmel il-profitti minn fuqhom.
Dwar il-programm lead li qed tmexxi l-Membru Parlamentari Ewropew Miriam Dalli u li dwaru komplew jikxfu l-iskop ewlieni tiegħu aktar tfajliet membri fih u li tkellmu ma Il-Mument, Muscat ma semma’ xejn. Dawn it-tfajliet qed isostnu li dan il-programm tal-Partit Laburista fih 85 mara li qed irawmuhom biex jimmilitaw fil-Partit Laburista favur Miriam Dalli li hi l-favorita’ biex tieħu post Joseph Muscat la darba jirriżenja.
