Għal darba oħra l-grupp Occupy Justice inġabar quddiem Kastilja, b’messaġġ b’saħtu għall-Prim Ministru Joseph Muscat. Dan wara li l-Ġimgħa, erba’ xhur mill-assassinju tal-ġurnalista Daphne Caruana Galizia, ġew imneħħija billboards li saru mill-istess għaqda.
Fakkru li Malta għandha jkollha l-libertà tal-espressjoni u b’hekk l-awtoritajiet m’għandhomx ineħħu billboards li fi kliemhom saru bil-permessi kollha neċessarji.
Huma sostnew li għalkemm għaddew ix-xhur, baqa’ ma sar xejn biex insibu min kien il-moħħ wara l-qtil tal-ġurnalista.
L-istess tliet banners tal-billboards ġew impoġġija taħt it-taraġ ta’ Kastilja flimkien ma’ banner ieħor bil-mistoqsija “Min qatel lil Daphne Caruana Galizia?” L-għajta tagħhom tibqa’ biex issir ġustizzja f’Malta.
