Tkompli l-kontroversja dwar Triq Ġorġ Borġ Olivier, li hi waħda mit-toroq l-iktar frekwentati fir-Rabat.
Dan hekk kif is-Sindku tar-Rabat Charles Azzopardi ddikjara magħna li din it-triq se ssir one way bi prova fuq suġġeriment ta’ Transport Malta, bil-konsegwenza li residenti Dinglin u dawk li joqgħodu fl-inħawi ta’ Radju Marija, se jkollhom iduru dawra mar-Rabat u jgħaddu min-Nigret biex jaslu sas-Saqqajja.
Iżda din id-dikjarazzjoni qajmet kontroversja sħiħa hekk kif jidher li kienu r-Rabtin biss li ġew avżati b’dan. Tant hu hekk li l-Kunsill Lokali ta’ Ħad-Dingli ħareġ jiċħad din l-aħbar, għaliex il-membri tiegħu qatt ma kienu avżati b’dan anzi ntqalilhom bil-kontra. Saħansitra talbu kjarifika minn Silvio Scerri, Chief Officer ta’ Transport Malta li qal li ma jaf b’xejn dwar dan it-tibdil.
Lil Net News, is-Sindku Charles Azzopardi ddikjara li waqt laqgħa ma’ Transport Malta fis-26 t’Awwissu li għadda, hu u grupp ta’ persuni li kienu qed jakkumpanjawh issuġerew li t-triq issir One Way kif ukoll li jitwessgħu l-bankini li huma dojoq fuq iż-żewġ naħat, kif ukoll saret insistenza biex vetturi kbar ma jitħallewx jgħaddu minn din it-triq.
Madankollu jidher li s-Sindku tar-Rabat Charles Azzopardi ma kienx qed jigdeb għaliex persuni oħra li akkumpanjawh għal din il-laqgħa, fosthom Christopher Farrugia mill-Kumitat Amministrattiv ta’ Tal-Virtù, kif ukoll Dr. Cedric Mifsud u Nikolai Attard qablu mal-verżjoni tas-Sindku … jiġifieri li Transport Malta wegħdithom li t-triq issir One Way bi prova.
Fil-passat din it-triq kienet inbidlet għal One Way iżda l-esperiment falla, ħoloq iżjed traffiku fil-qalba tar-Rabat u kellha tinbidel mill-ġdid għal Two Way tant kien hemm kritika.
B’hekk ir-residenti Dinglin u dawk Rabtin jibqgħu fl-għama dwar dak li se jseħħ – Transport Malta qed twiegħed lir-Rabtin li t-triq issir One Way, u twiegħed bil-kontra lid-Dinglin, jiġifieri li t-triq se tibqa’ Two Way.
Sadattant, f’komunikazzjoni preċedenti Charles Azzopardi kien akkuża lil dan is-sit b’gideb u qalilna li mar għal din il-laqgħa mhux “b’deċiżjoni ta’ persuna waħidha, iżda b’deċiżjoni tal-Kunsill li kienet waħda unanima.”
Fil-verità dan mhux minnu, tant li kif ikkonfermat mill-kunsillier Ian Vassallo, l-aħħar darba li l-kunsill iddiskuta dan kien f’Settembru tal-2016 meta skont il-minuti, “il-Kunsill qabel unanimament li t-traffic lights isiru waħda fi Triq Ġorġ Borg Olivier k/m Triq tal-Virtù u oħra fi Triq Ġorġ Borġ Olivier ħdejn ‘Radju Marija’ faċċata ta’ Triq San Piju V.”
Charles Azzopardi, meta mitlub jipprova mod ieħor, naqas milli jipprovdi minuti li jikkonfermaw dak li qalilna, u minflok ikkonferma li qabel mal-idea ta’ Transport Malta li t-triq issir One Way.
Dan kkonfermah ukoll il-kunsillier tal-Partit Nazzjonalista Ian Vassallo li fuq Facebook kiteb li l-kunsill lokali qatt ma qabel unanimament li t-triq issir One Way, kif qal lil dan is-sit is-Sindku Charles Azzopardi. Id-deċiżjoni unanima kienet li f’din it-triq issir sistemà ta’ traffic lights.
