Wara artiklu li deher f’In-Nazzjon dwar kif qed jikber in-negozju tad-droga fil-ħabs u li sar rejd fil-ħabs minn Pulizija pajżana, il-Gvern ħass il-ħtieġa li kellu joħroġ stqarrija. Deskritta bħala operazzjoni delikata fil-Faċilità Korrettiva ta’ Kordin, fl-istqarijja jingħad li saru tfittxijiet intensivi f’żewġ diviżjonijiet mis-Sezzjoni ta’ Kontra d-Droga fil-Korp tal-Pulizija.
L-istqarrija qalet li fit-tfittxija li saret għall-għarrieda ma nstab l-ebda mobile u l-ebda xorb alkoħoliku. Instabet biss internet key u għalhekk se jittieħdu passi fuq il-priġunier ikkonċernat. Instab ukoll ftit trab suspettuż fil-locker ta’ wieħed mill-priġunieri u se tinfetaħ inkjesta.
Il-Ministru għall-Intern u s-Sigurtà Nazzjonali Michael Farrugia qal li tfittixijiet simili se jkomplu jsiru b’mod regolari mill-uffiċjali tal-faċilità kif ukoll meta jinħass il-bżonn tal-Korp tal-Pulizija sabiex jiżguraw is-sigurtà tal-faċilità.
