Rapport: George Cassar
GŻIRA U……………..0
FLORIANA………….0
Gżira: J. Haber, R. Briffa, K. Thackray, D. Mambouana, C. Gatt Baldacchino, Moises (H. Garba 72’), E. Zarate (N. Muscat 66’), Z. Scerri, A. Cohen (J. Corbolan 89’), N. Okoye, A. Samb
Floriana: I. Akpan, A. Cini, J. Pisani, S. Nayar, E. Pepe, E. Marcelina. S. Pisani, A. Oyama, J. Cabral, M. Fontanella, M. Paolucci (D. Grima 75’)
Imwissija: N. Okoye 33’, E. Zarate 39’, A. Cohen 66’ (G), A. Cini 70’, S. Nayar 78’ (F)
Referee: Trustin Farrugia Cann
Assistenti Referees: Jurgen Spiteri, Dusan Petrovic
Il-Mument Plejer tal-Logħba: Andrew Cohen (Gżira United)
Attendenza: 534
Gżira United żammew il-vantaġġ ta’ erba’ punti fuq Floriana hekk kif il-partita ta’ bejniethom baqgħet mingħajr gowl sal-aħħar. B’dan ir-riżultat Gżira huma l-iktar kuntenti hekk kif issa telgħu temporanjament waħedhom fit-tielet post filwaqt li Floriana baqgħu fis-sitt post bit-tama tagħhom li jikkwalifikaw għall-Europa League qegħda dejjem tonqos.
Il-partita kienet waħda tattika fejn iż-żewġ difiżi għalqu tajjeb u ftit li xejn taw ċansijiet lill-attakkanti joħolqu okkażjonijiet ta’ gowl. Floriana mmissjaw il-veloċità ta’ Maurizio Vella li kien sospiż bħal ma kien ukoll Clyde Borg.
Il-kowċ Nicolas Chiesa lagħab lil Sebastian Nayar bħala difensur ċentrali fin-nuqqas ta’ Enzo Ruiz li għadu mweġġa’. Għalihom reġa’ ddiżappunta Michele Paolucci fit-tieni partita tiegħu bid-difiża ta’ Gżira ta’ spiss jirnexxielha twaqqgħu fin-nasba tal-offside. F’nofs il-grawnd Steve Pisani u Emerson Marcelina kellhom prestazzjoni tajba bħalma kellu Jurgen Pisani fuq il-faxxa xellugija tad-difiża.
Għal Gżira kien fil-forma l-veteran Andrew Cohen li kkombina tajjeb ma’ Ndubisi Okoye u Amadou Samb. Dan tal-aħħar kien fil-mira wkoll tal-partitarji tal-ekstim tiegħu u fl-ewwel taqsima kien hemm ukoll bidu ta’ diżgwid hekk kif is-Senegaliż deher jirreaġixxi għal xi kummenti mill-bank ta’ Floriana.
Fl-aħħar kwarta l-kowċ Gżirjan Darren Abdilla prova jċaqlaq ftit l-attakk billi daħħal lil Haruna Garba u lil Juan Carlos Corbolan iżda ma kienx biżżejjed biex ikisser il-ħajt Furjaniż. Ħames minuti qabel intemmet l-ewwel taqsima Andrew Cohen mar qrib il-gowl minn free-kick iżda l-gowlkiper Ini Akpan tar tajjeb u dawwar f’korner.
Fl-ewwel kwarta tat-tieni taqsima Cohen ta kross mix-xellug lejn Moises iżda l-captain ta’ Gżira, minkejja li kien żmarkat fil-kaxxa, laqat ferm ħażin. Fuq in-naħa l-oħra kien hemm azzjoni simili fejn ix-xutt mix-xellug ta’ Jurgen Pisani ma kien hemm ħadd biex ikomplih għal ġewwa.
Tliet minuti mit-tmiem xutt b’saħħtu fil-baxx tas-sostitut Haruna Garba kien salvat mal-art minn Akpan. Wara li ħelsu mill-ostaklu ta’ Floriana, il-ġimgħa d-dieħla Gżira għandhom missjoni diffiċli kontra t-tim tal-ewwel post Balzan.
