Rapport: Keane Cutajar
LIJA A…………………… 0
BALZAN……………….. 3
Lija: L. Bonnici, McA. Clinch (D. Agius 82’), P. Borg, D. Scerri, L. Schembri, A. Sammut, V. Hysa (R. Kooh Sohna 53’), O. Sidibe, K. Hirose, E. Beu, R. Sammut (G. Borg 75’)
Balzan: S. Mintoff, U. Ljobomirac, A. Effiong (J. Zerafa 76’), H. Ascrof, B. Gilio, B. Gilio de Oliveira, I. Bozovic, M. Lepovic (C. Brincat 73’), S. Arab, A. Alves, J. Grioli (F. Attard 87’), C. Mendes
Imwissija: McA. Clinch 3’ (L) C. Mendes 38’ (B)
Skorjaw: A. Effiong 31’, C. Mendes 60’, S. Arab 72’ (B)
Referee: Darryl Agius
Assistenti Referees: Roberto Vella, Paul Apap
Il-Mument Plejer tal-Logħba: Carlos Eduardo De Fiori Mendes (Balzan)
Fil-logħba li laqqgħet lit-tim ta’ fuq ma dak ta’ isfel, Balzan komplew iżommu posthom fil-quċċata b’rebħa komda fuq il-ġirien tagħhom Lija. Fil-klassifika issa hemm differenza ta’ 40 punt bejn dawn iż-żewġ timijiet, differenza li wriet fil-grawnd sa mill-ewwel sekondi.
Meta kienu għaddew biss tliet minuti, is-solitu Carlos Eduardo De Fiori Mendes kellu free-kick imdawwar f’korner minn Luke Bonnici li niżel tajjeb fil-baxx fuq ix-xellug tiegħu.
Għaxar minuti wara, il-leaders tal-kampjonat reġgħu resqu viċin wara kross mix-xellug ta’ Justin Grioli, din id-darba permezz ta’ Milos Lepovic li falla l-mira bi żbrixx u ta biss l-ilużjoni tal-gowl bil-ballun jaħbat max-xibka minn barra.
Mal-kwarta logħob, waslet ukoll l-ewwel azzjoni ta’ Lija permezz ta’ Erjon Beu li ttanta xortih minn barra l-kaxxa b’xutt li kien ċentrali u faċli għal Sean Mintoff li żamm f’żewġ tentattivi.
It-tim ta’ Micovic komplew iħabbtu l-bieb b’azzjoni perikoluża oħra li waslet fit-28 minuta, meta Siraj Eddin Arab daħal tajjeb bir-ras fuq il-kross mix-xellug, iżda sab lil Bonnici li salva tajjeb.
Tliet minuti biss wara, Balzan meritatament marru minn fuq. Kienet forsi xi ftit fortuna li daħqet lill-attakkanti li spiċċaw tlieta waħedhom quddiem il-gowlkiper ta’ Lija, b’Alfred EFFIONG jagħżel li jqabbeż minn fuq Bonnici minflok jgħaddi lejn sħabu għall-ewwel gowl tal-partita.
Balzan fetħu t-tieni taqsima kif għalqu l-ewwel waħda u kien imiss lil Alex Da Paixao Alves li jersaq viċin fejn seta’ għamel aħjar iżda kien imċaħħad b’save stupend ta’ Bonnici li dawwar f’korner. Mill-istess korner Bonnici reġa’ kien tajjeb.
Il-captain tal-ġurnata, Justin Grioli kien imċaħħad mill-free-kick tiegħu minn barra l-kaxxa minn Bonnici fis-57 minuta. Appena għaddew siegħa logħob, Balzan rebħu penalty meta Alves deher jiġi mwaqqa’ fil-kaxxa minn Schembri. Mill-ħdax-il metru DE FIORI MENDES ma żbaljax biex kważi kważi ssiġilla r-rebħa.
Siraj ARAB għaqqad it-tripletta ta’ Balzan u tefa’ iċ-ċirasa fuq il-kejk b’gowl stupend wara azzjoni personali brillanti li fiha daħal tajjeb fil-kaxxa qabel b’kumdità tefa’ fir-rokna.
