Fl-aħħar seba’ logħbiet skurja tmien gowls għat-tim ta’ Juventus – dan mhuwiex Paulo Dybala jew Gonzalo Higuain, iżda l-plejer Malti ta’ 12-il sena Julian Frazier li qed jitħarreg fl-akkademja ta’ Juventus f’Ruma.
Julian jgħix fil-kapitali Taljana, hekk kif ommu Vanessa Frazier, hi l-ambaxxatriċi Maltija f’dan il-pajjiż. F’Ruma stess, Julian jingħata taħriġ fl-akkademja tal-futbol ta’ Juventus – u NET News ħa l-opportunità jiltaqa’ miegħu hekk kif attenda għal sessjoni ta’ taħriġ tat-Training Camp tal-plejer internazzjonali Javier Zanetti li bhalissa wkoll qiegħed Malta.
Ma’ Julian tkellimna dwar il-ħolma tiegħu li saret realta’ u dwar l-esperjenza tiegħu ma’ Juventus. Julian qalilna wkoll, li minbarra f’Ruma hu mar ukoll Vinnovo, fil-kamp tal-akkademja ta’ Juventus f’Turin fejn hemmhekk ra lil numru ta’ plejers professjonali ta’ Juventus jitħarrġu. Qalilna li hu mar kemm-il darba jara lil Juventus, u huma wkoll it-tim favorit tiegħu. Iżda fl-aħħar tal-intervista Julian uriena wkoll il-kapaċita’ tiegħu bħala attakkant, fejn hu żgur li Julian se jibqa’ jagħmel unur lill-pajjiżna mal-klabb ta’ Juventus!
Waqt li konna qegħdin fil-grawnd ta’ Luxol, ħadna l-opportunita’ wkoll li nitkellmu mal-plejer internazzjonali Javier Zanetti li jinsab f’Malta għal din is-sessjoni ta’ taħriġ. Javier Zanetti qal li din is-sena wkoll kellhom sessjoni ta’ taħriġ tajba fejn numru ta’ żgħażagħ attendew għal Fondacion PUPI Zanetti, u wara kellhom l-opportunita’ li jieħdu ritratt u ċertifikat mal-idolu tagħhom.
Ara s-servizz aktar ‘l fuq.
Ritratti: Matthew Tabone
