Liverpool telgħu momentarjament fit-tieni post tal-Premier League Ingliż wara li f’Anfield għelbu lil West Ham 4-1. Kien Emre Can li fetaħ l-iskor fid-29 minuta b’daqqa ta’ ras mill-viċin wara azzjoni ta’ korner. It-tim ta’ Klopp irdoppja fil-51 minuta b’azzjoni tajba li fiha Sadio Mane għadda lil Mohamed Salah li b’xutt fil-baxx għar-rokna għeleb lil Adrian.
L-iskor sar 3-0 seba’ minuti wara b’Roberto Firmino jgħaddi l-ballun taħt saqajn Adrian u jiskorja f’lasta vojta. Iżda minuta wara, West Ham naqsu d-distakk b’xutt fil-baxx tas-sostitut Michail Antonio. Sadio Mane ssiġilla r-rebħa fis-77 minuta meta kompla għal ġewwa mill-viċin.
Leicester u Stoke spiċċaw fi draw ta’ 1-1 fil-King Power Stadium. Kienu Stoke li fetħu l-iskor qabel tmiem l-ewwel taqsima b’xutt għar-rokna ta’ Xherdan Shaqiri. Leicester ġabu d-draw fis-70 minuta, meta minn kross ta’ Marc Albrighton, il-gowlkiper Jack Butland naqas li jżomm il-ballun.
Rebħa kbira għal Brighton li rebħu 4-1 kontra Swansea. Glenn Murray fetaħ l-iskor fit-18-il minuta minn penalty, bl-istess plejer jirdoppja fid-69 minua b’gowl mill-viċin. Erba’ minuta wara, Anthony Knockaert għamilhom tlieta b’xutt fil-baxx. Swansea skorjaw l-uniku gowl tagħhom b’awto-gowl ta’ Lewis Dunk, iżda Jurgen Locadia ssiġilla r-rebħa fid-90 minuta.
Huddersfield rebħu barra minn darhom kontra West Bromwich Albion. Rajiv van la Parra poġġa lil Huddersfield minn fuq fid-49 minuta, u rduppjaw seba’ minuti wara minn Steve Mounie. Craig Dawson naqqas l-iskor fil-65 minuta iżda West Brom ma rnexxielhomx isalvaw il-logħba.
Draw ta’ 2-2 bejn Bournemouth u Newcastle. It-tim ta’ Benitez kien ħa vantaġġ doppju minn Dwight Gayle l-ewwel fit-18-il minuta mill-viċin, u minn pożizzjoni angolata qabel tmiem l-ewwel taqsima. Adam Smith daħħal lil Bournemouth b’xutt sabiħ għaxar minuti mit-tmiem, u Dan Gosling ġab id-draw mill-viċin fid-89 minuta.
Draw ukoll bejn Burnley u Southampton. Ashley Barnes fetaħ l-iskor fis-67 minuta iżda Southampton ġabu d-draw fid-90 minuta minn Manolo Gabbiadini.
Watford għelbu lil Everton 1-0 bil-gowl jasal għaxar minuti mit-tmiem minn Troy Deeney.
