Il-klabb tal-Waterpolo Valletta United jinsab għaddej bil-ħidma tiegħu biex isaħħaħ l-iskwadra tiegħu għal din is-sena. Il-Beltin li f’Ottubru li għadda kienu kkonfermaw lil Bogdan Rath bħala l-kowċ tagħhom, ħadu sehem fl-ewwel edizzjoni tal-Enemed Cup.
Huma kisbu żewġ rebħiet kontra Exiles u Ta’ Xbiex u telfiet bi prestazzjonijiet pożittivi kontra San Ġiljan, Sliema u Sirens bl-uniku telfa kbira tkun kontra Neptunes. Huma kienu spiċċaw fil-ħames post wara li rebħu l-play-off kontra Exiles Jetfreight 3-2.
Ritorn importanti għat-tim Belti se jkun dak ta’ Timmy Agius li ngħaqad mingħand Neptunes wara li ffirma kuntratt ta’ erba’ snin. Agius kien parti mit-tim ta’ Valletta fl-2011 u l-2012 meta dak iż-żmien Valletta kienu rritornaw fix-xena lokali fl-Ewwel Diviżjoni.
Hu rnexxielu jiskorja 19-il gowl fl-istaġun tas-sajf tal-2011 u fl-2012 skorja total ta’ 50 gowl, bi 33 gowl minnhom fil-kampjonat. Agius kien parti mit-timijiet ta’ Neptunes li rebħu l-kampjonat fl-2013, fl-2014 u fl-2016 minbarra li rebaħ diversi unuri oħra.
L-ewwel akkwist li għamlu Valletta kien tal-plejer żagħżugħ Keith Galea mingħand San Ġiljan li ffirma kuntratt ta’ erba’ snin. Galea li fl-2015 ifforma parti mit-tim ta’ San Ġiljan li rebaħ il-Kampjonat, l-istaġun li għadda Galea kien b’self ma’ Valletta fejn skorja sitt gowls fil-Kampjonat Premier.
Plejer ieħor li kien b’self ma’ Valletta hu Aleandro Mifsud li issa ngħaqad ma’ Valletta b’mod permanenti wara li ffirma kuntratt ta’ erba’ snin. Il-plejer ta’ 21 sena li kien proprjetà ta’ Sliema, fl-aħħar żewġ staġuni lagħab ma’ Valletta, skorja total ta’ seba’ gowls mal-Beltin fil-Kampjonat Premier.
Valletta akkwistaw ukoll lill-plejer ta’ 20 sena Michele Mifsud b’kuntratt ta’ erba’ snin mingħand Sliema, lill-gowlkiper veteran Reuben Bonnici, lil Luke Gialanze b’self mingħand Marsaxlokk u lil Nicholas Farrugia b’self mingħand Neptunes.
Valletta jiftħu l-impenji tagħhom fil-Kampjonat tax-xitwa l-Ġimgħa 16 ta’ Marzu kontra Neptunes Leo Vegas.
