Rapport: Keane Cutajar
SENGLEA A……………….0
FLORIANA………………..0
Senglea: M. Farrugia, J. Bondin, S. Bonnici, S. Uyi, I. Azzopardi, M. Garcia, H. Vella, I. Paz, B. Volpini, T. Vella (B. Gregori 90’), P. Sammut (G. Virano 86’)
Floriana: I. Akpan (M. Grech 85’), S. Nayar, E. Pepe, S. Pisani, M. Vella, J. Cabral, J. Pisani, M. Paolucci (D. Grima 46’), A. Cini, M. Fontanella, E. Marcelina
Imwissija: M. Garcia 26’, S. Pisani 37’, E. Pepe 60’ (F) J. Bondin 85’
Referee: Fydor Zammit
Assistenti Referees: Luke Portelli, Mitchel Scerri
Il-Mument Plejer tal-Logħba: Ivan Paz (Senglea Athletic)
Taħt ix-xemx li xelgħet il-gżejjer Maltin ilbieraħ wara nofsinhar, assistejna għal partita li kienet nieqsa minn azzjonijiet perikolużi, bl-uniċi azzjonijiet lejn il-lasti jkunu biss ċentrali.
It-taqsima inizjali kienet waħda ferm kwieta fejn il-maġġoranza tal-logħob kien f’nofs il-grawnd iżda b’ħafna passaġġi żbaljati miż-żewġ naħat li rrifletta fl-iskor ta’ tmiem it-taqsima.
Dan kompla matul it-tieni taqsima u frustra mhux ftit lin-nies preżenti fl-Istadium Nazzjonali f’Ta’ Qali, li wkoll wassal għal riżultat li aktar kienu kuntenti bih it-tim ta’ Senglea, li resqu pass ieħor viċin staġun ieħor fil-Premier. Minn naħa l-oħra Floriana ma dehrux daqshekk kuntenti bil-punt li kisbu li ħallihom fil-ħames post.
L-ewwel tentattiv lejn il-lasta minn naħa ta’ Senglea wasal minn free-kick ta’ Ivan Paz li iżda kien wisq ċentrali u ma ħoloq l-ebda prolemi għal Ini Akpan.
Floriana rrispondew permezz ta’ daqqa ta’ ras tad-difensur Enrico Pepe li tela’ minn wara biex iltaqa’ mal-korner ta’ Maurizio Vella, daqqa ta’ ras li kienet salvata minn Matthew Farrugia.
Appena għaddew 34 minuta, Volpini għadda tajjeb minn ma’ Pepe minn viċin il-limiti tal-kaxxa u kien imwaqqa’ qabel seta’ jkun perikoluż. L-istess plejer prova dirett mill-free-kick, bix-xutt tiegħu jiġi mdawwar f’korner b’save tajjeb fil-baxx ta’ Akpan.
Maurizio Vella venven minn barra l-kaxxa fit-42 minuta, xutt ieħor li ħareġ wisq ċentrali u spiċċa f’idejn Farrugia. Fil-65 minuta, xutt b’saħħtu ta’ Juninho Cabral kien imblokkat mid-difensuri tal-Isla u għal ftit ma sabx ruħu ġewwa iżda b’xorti tajba għat-tim ta’ Paolo Favaretto, il-ballun spiċċa f’korner.
Tmien minuti wara, Volpini forsi seta’ għamel aħjar fit-tentattiv bir-ras tiegħu minn pożizzjoni angolata, wara passaġġ tajjeb ta’ Paz, iżda tefa’ barra.
Senglea ħarġu bil-kontrattakk meta kien fadal għaxar minuti logħob iżda bit-tliet attakanti kontra żewġ difensuri naqsu milli jiftħu l-iskor bix-xutt finali ta’ Paz ikun kemmxejn fjakk. Emerson Marcelina daħal tajjeb bir-ras fis-86 minuta però xeħet għoli.
