It-tfajla li kmieni dalgħodu kienet involuta f’inċident bil-karozza f’Burmarrad, tilfet ħajjitha fl-isptar MaterDei.
Il-vittma hi mudella, Christa Formosa ta’ 23 sena mill-Iklin. Dan wara li l-vettura tagħha tat-tip Ford Ka marret għan-naħa l-oħra tat-triq fejn qabdet il-bankina, qaċtet siġra u wara waqfet ma’ arblu.
Ftit wara li seħħ l-inċident, fuq il-post marru numru ta’ karozzi tal-Pulizija, ambulanza, u tim mediku biex jagħtu l-ewwel assistenza. It-tfajla ttieħdet lejn l-isptar Mater Dei biex tirċievi aktar kura, iżda wara numru ta’ sigħat fit-Taqsima tal-Kura Intensiva tilfet ħajjitha.
Tmien xhur ilu, Christa kienet ħadet sehem f’Miss Universe Malta, fejn f’filmat ta’ żewġ minuti tkellmet dwar il-passjoni tagħha taż-żfin u anke d-doqq il-pjanu. Madanakollu, f’messaġġ personali minnha qalet li kieku kellha tirbaħ il-kompetizzjoni kienet tgħin lil tfajliet oħra li ma tantx ikunu jemmnu fihom infushom, filwaqt li saħqet li s-sbuħija hi fuq ġewwa. Ara l-messaġġ ta’ Christa fil-filmat t’hawn taħt:
Hekk kif ħarġet l-aħbar li Christa tilfet il-ġlieda kontra l-mewt, numru kbir ta’ sħabha mal-ewwel qasmu l-ħsibijiet tagħhom dwar din l-aħbar kerha. Uħud għażlu li jfakkru l-memorja ta’ Christa billi qasmu ritratti u memorji fuq il-media soċjali.
Aqra aktar dwar l-inċident hawnhekk:
Mudella ta’ 23 sena fil-periklu tal-mewt wara inċident f’Burmarrad
