Wara tliet xhur ta’ nixfa u nuqqas kbir ta’ xita fil-gżejjer Maltin, fi Frar bibien is-sema’ nfetħu. Madanakollu, pajjiżna żamm il-fama tiegħu – hekk kif f’Malta kellna l-iktar ġurnata sħuna mill-pajjiżi kollha Ewropej.
B’kollox niżlet 181.4mm ta’ xita – ammont li jaqbeż dak li ssoltu jinżel. Dan it-total qabeż in-normal b’56.9mm fi Frar u kien ammont rekord ikkumparat mat-tliet xhur ta’ qabel.
Il-Ġimgħa 9 ta’ Frar hi meqjusa bħala l-ġurnata li fiha niżel it-tieni l-akbar ammont ta’ xita sa mill-1923. Din il-ġurnata mimlija xita kompliet għaddejja sal-għada, fejn ħabtet mal-ġurnata tal-festi tal-Karnival u ħarbtet il-pjanijiet kollha fil-Belt Valletta u ġew ikkanċellati l-attivitajiet ta’ dakinhar.
Ukoll fl-istess xahar, il-gżejjer Maltin kienu maħkuma minn riħ qawwi, bit-13 ta’ Frar tkun l-aktar waħda qalila mid-direzzjoni tal-Majjistral.
L-iktar ġurnata kiesħa kienet fis-16 ta’ Frar – fejn niżlet għal 6.4°C, filwaqt li l-iktar ġurnata sħuna telgħet għal 18.6°C fil-25 ta’ Frar. Din it-temperatura wasslet għall-aktar ġurnata sħuna mhux biss f’Malta, iżda fl-Ewropa kollha. Fi Frar il-kontinent Ewropew kien friżat, b’temperaturi li ħatfu l-ħajja ta’ xi nies ukoll, partikolarment fil-Polonja.
Minkejja li Frar kien xahar griż, bi sħab jiksi lill-gżejjer – b’kollox f’Malta ġie rreġistrat total ta’ 135.6 siegħa ta’ xemx. L-iktar ġurnata li rat xemx fi Frar gawdiet 10 sigħat xemx, filwaqt li l-iktar ġurnata skura ma rat l-ebda raġġ tax-xemx.
L-Uffiċju Meterjoloġiku rreġistra tliet ijiem ta’ sajjetti u beraq fi Frar, fejn fi tnejn minnhom niżel is-silġ ukoll.
