Wara l-appell għar-revoka tal-liċenzja tal-Bank Pilatus, li l-Kap tal-Partit Nazzjonalista Adrian Delia għamel dalgħodu fid-dell tal-aħbar li Ali Sadr ġie arrestat fl-Istati Uniti, l-anqas ħaġa li wieħed kien jistenna mill-Prim Ministru u mill-Ministru tal-Finanzi kienet li anke huma jappellaw għall-istess revoka.
Hekk qal il-Kap tal-Partit Nazzjonalista Adrian Delia f’intervent waqt il-programm “Iswed fuq l-Abjad”, ippreżentat minn Frank Psaila fuq NET Television. L-intervent sar bl-internet minħabba li l-Kap tal-Partit Nazzjonalista jinsab imsiefer fuq xogħol tal-Partit.
Adrian Delia qal li wara dawn l-aħħar żviluppi, il-poplu qed jistenna biex jara kif se tirreaġixxi t-tmexxija tal-pajjiż. Madankollu, kulħadd qed jara kif Muscat għażel li ma jagħmel assolutament xejn u jibqa’ jiddefendi lill-Bank Pilatus bis-skiet tiegħu.
Hekk kif għajnejn id-dinja reġgħu fuqna, minħabba li l-Bank ta’ Ali Sadr hu rreġistrat f’pajjiżna, il-Gvern għandu jagħti każ ir-reputazzjoni ta’ Malta fis-servizzi finanzjarji minflok ma jibqa’ jiddefendi l-indifensibbli, kif qed jagħmel.
Filwaqt li sostna li ma jistax ikun li minkejja din l-evidenza ċara, jibqa’ ma jsir xejn, il-Kap tal-Partit Nazzjonalista qal li jistenna li l-Prim Ministru u l-Ministru tal-Finanzi jerfgħu r-responsabbiltà. Jekk m’intomx lesti tagħmlu xi ħaġa issa, warrbu, appella Adrian Delia.
Il-Kap tal-Partit Nazzjonalista qal li wasal iż-żmien li jekk il-Gvern jibqa’ jabdika mir-responsabbiltà, ikun il-Partit Nazzjonalista li jipproteġi s-servizzi finanzjarji tal-pajjiż.
B’hekk, nieqfu nippuntaw is-swaba’, iżda naġixxu għall-ġid tal-pajjiż, temm jgħid Adrian Delia.
We have the #FinancialServices in jeopardy and @JosephMuscat_JM is not insisting for the revocation of the licence for Pilatus Bank. If we truly want to safeguard our national interest, we need to take concrete action NOW before it is too late pic.twitter.com/JOsZKIJTZH
— Adrian Delia (@adriandeliapn) March 22, 2018
