F’pajjiżna għad fadal aktar minn 20,000 persuna li mhux kapaċi jaġġornaw ħwejjiġhom u jbiddluhom għall-ġodda, fejn madwar nofshom saħansitra qalu li ma jaffordjawx jixtru ħwejjeġ ġodda.
Dan ħareġ minn stħarriġ ieħor tal-Uffiċċju Nazzjonali tal-Istatistika, li fih irriżulta wkoll kif aktar minn 21,000 persuna m’għandhomx aktar minn żewġ pari żraben, b’aktar minn 14,000 minnhom qalu li għax ma jaffordjawx.
L-NSO qed jirrapporta wkoll tnaqqis fil-persuni fir-riskju tal-faqar, fejn l-aktar li għadhom milquta negattivament huma ż-żgħażagħ ta’ taħt it-18-il sena.
Barra minhekk, jirriżulta wkoll li 7.2 fil-mija ma jaffordjawx joħorġu għal ikla jew sempliċiment għal drink mal-familja jew ma’ sħabhom għall-anqas darba fix-xahar.
Dan jammonta għal kważi 26,000 persuna, li qalu li ma jaffordjawx, filwaqt li kważi 34,000 persuna oħra wieġbu b’raġunijiet oħra dwar in-nuqqas ta’ possibbiltà li jieklu jew jixorbu mal-familja jew ma’ sħabhom.
