Il-kap tal-infurzar tal-Awtorità tal-Ippjanar flimkien mal-iżviluppatur u l-perit tal-proġett ta’ Villa San Injazju jistgħu jiffaċċjaw żmien ta’ priġunerija minħabba t-twaqqigħ ta’ din il-binja storika f’San Ġiljan.
Dan ħareġ mill-Qorti hekk kif il-Ġimgħa kompliet tħares lejn dan il-każ. Il-Qorti ddeċidiet li t-twaqqigħ ta’ parti kbira minn dan il-monument arkitettoniku storiku hu ksur ta’ ordni tal-qorti mogħtija preċedentement.
Infatti r-Reġistratur tal-Qorti ġie msejjaħ biex jingħata bidu għal proċedimenti fil-qorti kontra l-kap tal-infurzar tal-PA, l-iżviluppatur Paul Gauci u l-perit tiegħu Stephen Vancell.
Jekk jinstabu ħatja, jistgħu jiffaċċjaw multa jew saħansitra priġunerija.
Il-villa hija parti minn proprjetà akbar li fiż-żmien serviet ukoll bħala l-ewwel Kulleġġ tal-Ġiżwiti f’Malta, u li kienet imsemmija bħala bini monumentali f’pajjiżna fl-1839.
Ħaddiema kienu waqqgħu parti mill-villa bejn Novembru u Diċembu li għadda, ftit ġranet wara li l-NGO Din L-Art Ħelwa kienet applikat biex il-bini jiġi skedat.
Il-filmat xokkanti li kien mxerred fuq bosta siti kien wera bċejjeċ tal-bini emblematiku ridotta biss għal serratura u l-PA ma ħadet l-ebda azzjoni biex twaqqaf it-twaqqiegħ tal-binja. Aktar tard ħarġet stqarrija li tiddikjara li x-xogħol twettaq minkejja ordni tal-qorti mogħtija f’Ġunju.
L-NGO, rappreżentata mill-avukat Franco Vassallo, argumentat li l-ordni tal-qorti kienet ipprovdiet biss għat-tneħħija ta ‘strutturi perikolużi’ u kienet teħtieġ li kull xogħol jitwettaq taħt is-superviżjoni ta’ perit nominat mill-qorti, li qal li qatt ma kien innotifikat.
L-avukat Vassallo qal li s-sentenza kellha impatt enormi ta’ ramifikazzjonijiet, u n-nies involuti għandhom jirriżenjaw.
Filwaqt li l-kap tal-PA Johann Buttigieg ma nstabx ħati għal ksur ta’ ordni tal-qorti, Vassallo qal li l-qorti sabet li l-azzjonijiet tiegħu matul l-affari kienu “inaċċettabbli”.
