Ewropa • Lokali

L-ikbar assoċjazzjoni tal-istudenti fl-Ewropa tappella għas-saltna tad-dritt f’Malta

30 ta' April 2018
L-EDS tirrappreżenta 1,600,000 student minn 35 pajjiż

L-Istudenti Demokratiċi Ewropej, l-EDS, semmiet lil Malta b’mod speċifiku meta fi stqarrija għall-media appellat lill-istituzzjonijiet Ewropej biex jassiguraw li s-saltna tad-dritt tkun rispettata.

L-EDS qalet dan fi stqarrija li fiha ddikkjarat l-appoġġ tagħha għal ‘The Daphne Project’, li qed jiġbor 45 ġurnalist minn 18-il pajjiż differenti biex ikomplu l-istejjer li kienet bdiet il-ġurnalista Maltija maqtula Daphne Caruana Galizia.

L-EDS tirrappreżenta aktar minn miljun u nofs student minn 35 pajjiż differenti fl-Ewropa. Dan jagħmel lill-EDS l-ikbar assoċjazzjoni tal-istudenti fl-Ewropa

Fl-istqarrija tagħha, l-EDS qalet li tinnota li l-Gvern għadu ma ħa l-ebda azzjoni anke jekk ġew żvelati stejjer li mhux biss assoċjaw Ministru Malti ma’ wieħed mill-akkużati fil-qtil ta’ Caruana Galizia, iżda saħansitra ġiet traċċat trasferiment ta’ flus mill-Ażerbajġan għal kontijiet bankarji assojati ma’ Ministru tal-Gvern u maċ-Chief of Staff tal-Prim Ministru.

Dwar l-appell tagħha biex f’Malta jkun hawn impenn ikbar favur is-saltna tad-dritt, l-EDS qalet li qed testendi l-appoġġ tagħha għall-poplu Malti li jrid li f’pajjiżu jkun hemm is-saltna tad-dritt, u kif ukoll istituzzjonijiet indipendenti li jaħdmu mingħajr indħil politiku.