Xahar wara t-tieni leg tal-kwarti tal-finali bejn Real Madrid u Juventus, il-UEFA ħarġet l-ewwel deċiżjonijiet fuq dak li seħħ fi tmiem u wara l-partita.
Jidher li nfetħu żewġ proċeduri fil-konfront tal-gowlkiper Gianluigi Buffon. L-ewwel proċedura hi minħabba l-karta l-ħamra diretta li ntwera għal protesti mir-referee Michael Oliver. It-tieni waħda hi għal dak li qed isejħu bħala ksur ta’ komportament tal-prinċipji ġenerali.
Il-Kummissjoni Dixxiplinari tal-UEFA se tiddeċiedi fil-31 ta’ Mejju, meta Buffon se jkun għalaq il-karriera tiegħu u probabbli jiddeċiedi biss li jilgħab l-aħħar logħba fl-4 ta’ Ġunju, fil-partita ta’ ħbiberija bejn l-Italja u l-Olanda.
Juventus kienu tilfu l-ewwel leg 3-0 fl-Allianz Stadium, iżda rkupraw it-tliet gowls f’Santiago Bernabeu, sakemm Real Madrid ingħataw penalty fit-93 minuta li qajjem protesti kbar mill-plejers ta’ Juventus. Buffon kien tkeċċa għal protesti kbar fil-konfront tar-referee Ingliż Michael Oliver.
Wara l-partita, Buffon kien saħansitra kritika d-deċiżjoni ta’ Oliver, fejn qal biex ħa dik id-deċiżjoni, ir-referee minflok qalb f’sidru kellu “landa taż-żibel.”
