Il-kowċ nazzjonali Ingliż Gareth Southgate se jkun qed isejjaħ l-iskwadra tiegħu għat-Tazza tad-Dinja sas-16 ta’ Mejju hekk kif irid li jkollu l-pjanijiet ċari fil-partiti ta’ ħbiberija kontra n-Niġerja u l-Costa Rica. Wara li sat-Tnejn li ġej trid issir lista ta’ 35 plejer, il-FIFA ma għandix bżonn il-lista finali qabel l-4 ta’ Ġunju. Il-maġġoranza tal-plejers jidher li huma deċiżi minn Southgate, iżda għad fadal postijiet għal diversi plejers.
Jack Wilsere ma lagħbx mat-tim Ingliż minn meta sfaw eliminati mill-Iżlanda mill-Euro 2016, iżda rwol aktar prominenti fit-tim ta’ Arsenal reġgħu fetħu t-tamiet li jkun fl-iskwadra, speċjalment wara li weġġa’ Alex Oxlade-Chamberlain.
Id-difensur laterali ta’ Liverpool Trent Alexander-Arnold ukoll qed jiġi kkunsidrat wara li kellu staġun tajjeb ma’ Liverpool. Kyle Walker hu fost dawk li se jkun fl-iskwadra, b’Kieran Trippier jidher li hu r-riserva tiegħu fid-difiża.
Fuq in-naħa l-oħra tad-difiża, Ashley Young u Danny Rose jibqgħu favoriti li jkunu mgħajjta, minkejja sfida minn Aaron Cresswell, Luke Shaw u Ryan Sessegnon. Joe Gomez seta’ kien għażla fid-difiża għal Southgate, iżda weġġa’ l-għaksa.
Adam Lallana hu plejers ieħor ta’ Liverpool b’dubji fuq il-kundizzjoni tiegħu iżda jista’ jkun inkluż speċjalment jekk jilgħab kontra Brighton. Fabian Delph hu plejer versatili iżda għadu jrid ikun imsejjaħ minn Southgate.
Fid-difiża, John Stones, Phil Jones u Harry Maguire jidher li huma ċerti minn posthom, b’James Tarkowski u Gary Cahill jinsabu fi dwell bejniethom. Dubju ieħor li għandu l-kowċ Ingliż hu fil-lasta. Jordan Pickford u Jack Butland jidhru li huma l-favoriti, bi dwell bejn Joe Hart u Nick Pope.
L-Ingilterra tilgħab kontra n-Niġerja f’Wembley Stadium fit-2 ta’ Ġunju u kontra l-Costa Rica f’Elland Road ħames ijiem wara, qabel ma jitilqu lejn ir-Russja. Huma jiftħu l-impenji tagħhom fit-Tazza tad-Dinja kontra t-Tuneżija fit-18 ta’ Ġunju f’Volgograd. Iż-żewġ avversarji l-oħra fil-grupp huma l-Panama u l-Belġju.
