Fl-okkażjoni tal-40 sena anniversarju mit-twaqqif tal-Inter Club Malta, il-partitarji ta’ Inter se jkollhom opportunità tajba li jiltaqgħu ma’ Dejan Stankovic. L-eks plejer aċċetta l-istedina tal-Inter Club Malta u se jkun qiegħed f’pajjiżna bejn is-7 u d-9 ta’ Ġunju. Din iż-żjara ta’ Stankovic se tkun possibbli grazzi għall-għajnuna ta’ Dr. Chris Bonett b’kollaborazzjoni ma’ Dizz Group.
Hu ppjanat li l-Inter Club Malta jorganizza kamp ta’ taħriġ fejn l-istess Stankovic se jkun qed iħarreġ it-tfal f’nursery rinomata f’pajjiżna, kif ukoll jattendi ikla organizzata għall-membri tal-Inter Club Malta fil-Grand Hotel Excelsior il-Furjana.
Dejan Stankovic beda l-karriera tiegħu fis-Serbja ma’ Red Star Belgrade. Hu ngħaqad ma’ Lazio fejn dam magħhom sitt snin u rebaħ il-kampjonat, il-Coppa Italia u t-Tazza tat-Tazzi. Fl-2004 hu ngħaqad ma’ Inter, b’Stankovic jilgħab għaxar staġuni ma’ Inter, il-klabb li rtira miegħu. Ma’ Inter il-midfielder Serb rebaħ ħames darbiet il-kampjonat, erba’ darbiet il-Coppa Italia, erba’ darbiet is-Supercoppa Italian, it-Tazza tad-Dinja tal-klabbs u l-UEFA Champions League.
Stankovic kien parti wkoll mill-istaġun mit-tim ta’ Inter li rebaħ it-triplete fl-istaġun 2009/2010. Hu lagħab għal diversi snin mat-tim nazzjonali ta’ pajjiżu u fl-aħħar snin tal-karriera tiegħu kien captain tat-tim nazzjonali.
Wara li rtira, Stankovic ħadem fi rwoli tekniċi fil-futbol bħala assistent ta’ Andrea Stramaccioni ma’ Udinese u kien irritorna ma’ Inter fejn kellu rwol diriġenzjali. Fl-aħħar sena u nofs, Stankovic ħadem mal-UEFA fis-settur tat-taħriġ tekniku għall-kowċis.
