Gżira United jinsabu wkoll għaddejjin biex isaħħu l-iskwadra tagħhom li biha spiċċaw fit-tielet post fil-Kampjonat Premier. Bi preparazzjoni għall-istaġun li ġej, fejn Gżira se jkunu impenjati fil-UEFA Europa League, il-Maroons għalqu t-trasferiment ta’ Rodolfo Soares.
Id-difensur Brażiljan iffirma kuntratt ta’ sentejn ma’ Gżira, fejn se jkun qed joffri garanzija fid-difiża, bid-difensur Prince Destin Mambouana jġedded il-kuntratt ma’ Gżira għal sena oħra.
Soares kien ilu seba’ staġuni ma’ Hibernians. Mal-klabb Pawlist rebaħ darbtejn il-Kampjonat, darbtejn l-FA Trophy u darba s-Super Cup.
F’kuntatt li dan is-sit għamel ma’ Rodolfo Soares, id-difensur Brażiljan qal li meta ngħaqad ma’ Hibernians, il-mira tal-klabb kienet li jirbħu t-tazzi, iżda qal li l-miri inbidlu. Il-Brażiljan qal li għażel lil Gżira għaliex iħobb l-isfidi u l-klabb għandu ambizzjonijiet tajbin ħafna.
