L-Għaqda Ġurnalisti Sports kienet preżenti għal sena oħra għall-Kungress Annwali tal-AIPS, l-Assoċjazzjoni Internazzjonali tal-Media tal-Isport.
Fil-81 Kungress tal-AIPS li sar fi Brussell bejn it-8 u d-9 ta’ Mejju ġew diskussi diversi temi relatati mal-ħidma tal-ġurnalisti tal-Isport. Fost l-iktar temi interessanti, kien hemm l-era diġitali tal-media, fosthom it-trend tal-informazzjoni online, u l-media soċjali.
Fil-Kungress kien ippreżentat ukoll ir-ristrutturar li għaddej fi ħdan il-Kumissjonijiet tal-AIPS u aktar opportunitajiet ta’ taħriġ għall-ġurnalisti tal-Isport Żgħażagħ permezz tal-programm AIPS Young Reporters.
Fil-Kungress saru diversi preżentazzjonijiet interessanti minn diversi mistiedna fosthom mill-Federazzjoni tal-Futbol tal-Marokk u minn #United26 bid iffurmata mill-Federazzjonijiet tal-Futbol tal-Messiku, il-Kanada u l-Istati Uniti li taw dettalji dwar is-sottomissjonijiet rispettivi tagħhom sabiex jorganizzaw l-edizzjoni tat-Tazza tad-Dinja tal-FIFA tas-sena 2026.
Waqt il-81 Kungress tal-AIPS saru preżentazzjonijiet oħra fosthom mill-Moviment Special Olympics, mill-Olympic Channel tal-Kumitat Olimpiku Internazzjonali u mill-FIFA, b’dawn tal-aħħar jagħtu l-aħħar dettalji dwar l-użu tal-VAR u dwar il-faċilitajiet tal-media waqt li se jkunu disponibbli għall-ġurnalisti waqt it-Tazza tad-Dinja Russja 2018.
L-Għaqda Ġurnalisti Sports kienet rappreżentata waqt dan il-Kungress mill-President Sandro Micallef u mis-Segretarju Organiżattiv Antvin Monseigneur.
Preżenti wkoll waqt il-Kungress, Charles Camenzuli President tal-AIPS Europe li apparti s-sessjonijiet tal-Kungress ħa sehem ukoll waqt l-Eżekuttiv tal-AIPS li sar lejliet il-bidu tal-Kungress u mexxa wkoll il-Laqgħa Annwali tal-AIPS Europe li preċediet il-laqgħa tal-Eżekuttiv tal-AIPS Europe.
Il-81 Kungress tal-AIPS ġie fi tmiemu b’diskors tal-President tal-AIPS Gianni Merlo.
Għal aktar informazzjoni dwar l-AIPS u aktar ritratti relatati ma’ dan il-kungress tista’ tinkiseb mill-website www.aipsmedia.com.
