L-Assoċjazzjoni tal-Pulizija ta’ Malta ikkundannat kategorikament u bla riservi dak li seħħ dalgħodu, fejn il-Kuntistabbli Simon Schembri safa ferut gravment.
Fi stqarrija, l-MPA qalet illi dak li gara huwu bla dubju ta’ xejn inaċċettabbli li jseħħ f’soċjeta’ li suppost hija wahda ċivili u normali.
Mingħajr preġudizzju għal kif għad jiżvolġi l-każ quddiem il-Qrati, ma nistgħux nibqgħu b’ħalqna magħluq u fis-silenzju, meta kollega tagħha, u membru tal-Korp tal-Pulizija, li jirrappreżenta Awtorita’ tal-Istat jispiċċa f’dan l-istat minħabba l-qadi ta’ dmirijietu.
“Wisq nibżgħu, u kważi nkunu qed ngħixu f’illużjoni, jekk ma ngħarfux u ma naċċettawx li dan
jista’ jkun rifless ta’ soċjeta’ li hija nieqsa minn kull dixxiplina u rispett lejn l-Awtorita’ u min
jirrappreżentha.”
L-MPA qed titlob bil-qawwa kollha tagħna, sabiex il-Gvern jieħu bl-akbar serjeta’ din is-sitwazzjoni u l-periklu li l-Pulizija jssaqqaf wiċċu miegħu ta’ kuljum fil-qadi ta’ dmirijietu.
“Ma nistgħux nassiguraw stat sigur lill-pubbliku jekk ma jkun hawn l-ebda dixxiplina fit-triq. Din ir-responsabbilta’ trid tinġarr minn kulħadd, tibda mill-għola awtoritajiet u tibqa’ nieżla sal-familja fid-dar.”
L-MPA se tagħmel minn kollox, biex issir gustizzja wara dan l-inċident mill-aktar serju.
L-aggressur, Liam Debono ta’ 17-il sena u li joqgħod Ħal Tarxien ġie arrestat minn diversi membri tar-Rapid u Special Intervention Unit li ħarġu mill-bażi tagħhom f’Ta’ Kandja fejn interċettaw lill-ġuvni u arrestawh immedjatament fi Triq Ħal Farruġ.
Il-kuntistabbli Simon Schembri għadu f’qagħda kritika.
