Il-barranin fil-Kampjonat Premier huma kollha magħrufa
Il-klabb tal-Waterpolo Valletta United ħabbar li Marton Toth se jkun il-barrani tagħhom għal dan l-istaġun tas-sajf. Toth li għadu 32 sena hu eks plejer tat-tim nazzjonali Ungeriż u matul il-karriera tiegħu rebaħ il-Kampjonat Ungeriż seba’ darbiet.
Toth kien parti mit-tim nazzjonali Ungeriż li spiċċa fit-tieni post fil-Kampjonat Ewropew tal-2014. F’dak it-tim kien hemm ukoll Adam Decker li fil-passat lagħab ma’ Valletta u Norbert Hosnyanszky li f’dan is-sajf se jilgħab ma’ Marsaxlokk.
Din mhux se tkun l-ewwel darba li Marton Toth jilgħab f’pajjiżna hekk kif fil-passat lagħab ma’ Otters, San Ġiljan, Sliema u Exiles.
