Alvaro Lizaur rebaħ il-BOV Plejer tax-Xahar tal-Ewwel Diviżjoni għal April. L-Ispanjol li fih sitt piedi u seba’ pulzieri, diġà kien rebaħ dan l-unur dan l-istaġun u kien sar l-ewwel plejer ta’ Hibernians li rebaħ dan l-unur minn April tal-1990. Lizaur kien pedina importanti fit-tim tiegħu biex Hibernians rebħu l-ewwel kampjonat wara 28 sena.
Samantha Brincat ukoll ta’ Hibernians rebħet l-unur tal-Plejer tax-Xahar tan-nisa. Għal Brincat dan hu t-tieni premju individwali fl-istaġun u r-raba’ wieħed fil-karriera. Hi kienet strumentali biex Hibernians rebħu l-kampjonat tan-nisa fejn ukoll rebħet il-Most Valuable Player (MVP) tal-finali.
Vukassin Jandric ta’ Luxol rebaħ l-unur tal-BOV Amateur League. Dan ukoll hu t-tieni unur għal Jandric dan l-istaġun. Is-Serb li hu wieħed mill-aktar skorers prolifiċi fit-tim speċjalment mid-distanza, għen lil Luxol jaslu sas-semifinali tal-kampjonat.
L-Uffiċjal Kap tal-BOV Peter Perotti ppreżenta plakka kommemorattiva lit-tliet rebbieħa.
