Fl-2020 il-belt ta’ Istanbul fit-Turkija se tkun qed tospita l-finali taċ-Champions League.
Dan ifisser li l-finali ta’ din il-kompetizzjoni se tkun qed issir 15-il sena wara l-ewwel finali li saret f’din il-belt. Dakinhar, fl-2005 Liverpool kienu għelbu lil Milan bl-għoti tal-penalties wara li l-partita kienet intemmet fi draw ta’ 3-3. Dik il-finali tibqa’ titqies bħala waħda mill-aktar finali memorabbli hekk kif sa tmiem l-ewwel taqsima Milan kienu qed jirbħu 3-0 imma r-Reds baqgħu jemmnu u wettqu rimonta inkredibbli.
L-aħbar dwar il-finali tal-2020 f’Istanbul ħarġet wara deċiżjoni meħuda mill-Kumitat Eżekuttiv tal-UEFA waqt laqgħa li saret fi Kiev, fejn għada se tintlagħab il-finali tal-edizzjoni ta’ din is-sena bejn Real Madrid u Liverpool.
L-Olympic Stadium ta’ Ataturk għandu kapaċitá ta’ 76,000 u għeleb l-isfida tal-grawnd ta’ Lisbona, Estadio da Luz. Ta’ min jiftakar li anke f’dan il-grawnd, fl-2014, diġa’ ntlagħbet finali taċ-Champions League, dik bejn Real Madrid u Atletico Madrid fejn kienu l-Merengues li ħarġu rebbieħa.
Il-finali tal-UEFA Europa League tal-2020 se tintlagħab f’Gdansk, fil-Polonja, filwaqt li s-Super Cup Ewropea se tintlagħab f’Estadio Dragao, f’Porto, fil-Portugall. Ta’ min jinnota li Estadio Dragao kien fi sfida mal-grawnd Pollakk biex jospita l-finali tal-Europa League imma minflok ingħata l-finali tal-UEFA Super Cup li hi finali bejn ir-rebbieħ taċ-Champions League u r-rebbieħ tal-Europa League.
Il-finali tal-UEFA Champions League tan-nisa se tintlagħab, fl-Austria Arena, fi Vjenna.
Intant, il-Kumitat Eżekuttiv tal-UEFA ħabbar ukoll l-iskeda tal-partiti tal-Euro 2020 li għall-kuntrarju tas-soltu, il-kompetizzjoni se tintlagħab madwar diversi pajjiżi Ewropej.
Il-grawnd ta’ Wembley fl-Ingilterra se jospita l-partiti tal-fażi tal-gruppi, logħba mill-fażi tal-aħħar 16, is-semifinali u l-finali tat-12 ta’ Lulju tal-2020.
Fuq in-naħa l-oħra l-grawnd ta’ Hampden Park fi Glasgow l-Iskozja se jospita partiti mill-fażi tal-gruppi u logħba mill-fażi tal-aħħar 16 filwaqt li l-Aviva Stadium f’Dublin fl-Irlanda se jospita partiti mill-fażi tal-gruppi u logħba mill-fażi tan-knockout.
