Il-manager ta’ Tottenham Hotspur Mauricio Pochettino ġedded il-kuntratt tiegħu b’ħames snin biex issa hu marbut mal-klabb sal-2023. Pochettino, li għandu 46 sena kien ingħaqad mal-Ispurs lura fl-2014 u fl-aħħar tliet staġuni dawn dejjem spiċċaw mal-ewwel tlieta.
Bħalissa Tottenham qed jistennew biex jitlesta l-grawnd il-ġdid ta’ White Hart Lane li ġie modernizzat hekk kif matul dan l-istaġun li għadu kemm intemm huma lagħbu fil-grawnd ta’ Wembley.
Pochettino, eksmanager ta’ Southampton għandu esperjenza vasta fil-Premiership Ingliż u hu meqjus bħala wieħed mill-aħjar managers ta’ dan il-kampjonat.
Madankollu kien hemm mumenti fejn fihom dan ġie kritikat minħabba l-fatt li għalkemm dejjem it-tim tiegħu kiseb riżultati pożittivi matul l-aħħar snin dawn naqqsu milli jirbħu trofej maġġuri.
