Illejla fl-Ukrajna tintlagħab il-finali taċ-Champions League bejn Real Madrid u Liverpool. It-tim Spanjol se jkun qed jipprova, għat-tieni darba fl-istorja tiegħu, jirbaħ it-titlu għat-tielet darba konsekuttiva. Jekk jagħmlu dan ikunu rebħu din il-kompetizzjoni għat-13-il darba fl-istorja tagħhom filwaqt li Liverpool se jippruvaw jirbħuha għas-sitt darba fl-istorja tagħhom.
Wieħed jista’ jgħid li din il-finali se tkun bejn żewġ timijiet li għandhom rekord mill-aqwa f’din il-kompetizzjoni, hekk kif Milan biss rebħuha aktar minn Liverpool filwaqt li Real huma l-aktar tim li rebħu ċ-Champions League jew kif kienet magħrufa, it-Tazza tat-Tazzi.
Lura bejn l-1956 u l-1960 Real kienu rebħu din it-tazza ħames darbiet wara xulxin u jekk illejla jirbħu l-partita jsiru l-ewwel tim li jkun rebaħ it-titlu tliet darbiet wara xulxin. Ajax (1971-1973) u Bayern Munich (1974-76) huma ż-żewġ timijiet l-oħra li fil-passat rebħu din it-tazza tliet darbiet infila.
Sena ilu Real Madrid rebħu l-finali kontra Juventus filwaqt li sena qabel kienu ħarġu rebbieħa bl-għoti tal-penalties fil-finali kontra Atletico Madrid. Minn naħa tagħhom Liverpool se jkunu qed jilagħbu finali wara nuqqas ta’ 11-il sena. Dakinhar huma kienu tilfu kontra Milan u din kienet waħda miż-żewġ finali li tilfu.
Fatt interessanti hu li lura fl-1981 dawn iż-żewġ timijiet kienu ltaqgħu fil-finali meta dakinhar kienu r-Reds li ħarġu rebbieħa f’Pariġi. Dak kien it-tielet suċċess għal Liverpool fil-kompetizzjoni filwaqt li dik kienet l-aħħar telfa li sofrew il-Merengues f’finali. Barra minn hekk, dik kienet l-uniku darba li tim Ingliż għeleb tim Spanjol f’finali ta’ kompetizzjoni Ewropea u dan kollu jawgura tajjeb għal Liverpool.
Il-konfront tal-1981 kien wieħed minn ħamsa bejn dawn iż-żewġ timijiet. Minn dawn il-ħames partiti Liverpool rebħu tlieta u Real rebħu tnejn. L-aħħar darba li lagħbu kontra xulxin kien fil-fażi tal-gruppi tal-istaġun 2014-15 meta dakinhar Real rebħu ż-żewġ konfronti. F’Anfield Real kienu rebħu 3-0 u fil-Bernabeu rebħu 1-0.
Bla dubju l-attenzjoni se tkun l-aktar fuq żewġ plejers, Cristiano Ronaldo ta’ Real Madrid u Mohamed Salah ta’ Liverpool. Dawn it-tnejn kienu l-protagonisti tat-timijiet tagħhom matul l-istaġun. Ronaldo, li hu l-aqwa skorer tal-kompetizzjoni bi 15-il gowl waqqaf rekord impressjonanti billi sab ix-xibka 11-il darba konsekuttiva fl-edizzjoni ta’ din is-sena.
Illejla Ronaldo jista’ jsir l-ewwel plejer fl-istorja li jkun skurja f’erba’ finali taċ-Champions League.
Hu diġa’ għandu r-rekord tal-uniku plejer li skurja fi tliet finali wara d-doppjetta ta’ sena ilu f’Cardiff kontra Juventus. Plejer ieħor ta’ Real li jista’ jilħaq ir-rekord attwali ta’ Ronaldo hu l-captain u difensur Sergio Ramos jekk kemm-il darba jsib ix-xibka.
Salah skurja 10 gowl fiċ-Champions League u spikka bil-kbir fl-ewwel sena tiegħu ma’ Liverpool billi waqqaf rekord fil-Premiership Ingliż bi 38 logħba hekk kif skurja 32 gowl. B’kollox, l-Eġizzjan skurja 44 darba u bla dubju li Real jridu jkunu attenti minnu fil-konfront tal-lejla.
Filwaqt li kemm Liverpool kif ukoll Real Madrid għandhom plejers ta’ kalibru mondjali wieħed jinnota kif l-iskwadra ta’ Real hi mimlija bi plejers li għandhom esperjenza vasta f’finali ta’ kompetizzjoni prestiġjuża bħal ma hi ċ-Champions League.
Ramos, Ronaldo, Bale, Luka Modrić, Karim Benzema, Dani Carvajal, Marcelo u Isco se jkunu qed jilagħbu fir-raba’ finali tagħhom filwaqt li l-ebda plejer ta’ Liverpool ma lagħab f’finali ta’ Champions League.
Id-differenza m’hijiex biss fl-iskwadri imma anke fis-suċċess li kisbu l-kowċis tat-timijiet rispettivi. Sena ilu Zinédine Zidane, kowċ ta’ Real, sar l-ewwel kowċ fl-istorja li rebaħ din il-kompetizzjoni darbtejn wara xulxin u jista’ jkompli jibni fuq dan ir-rekord illejla. Barra minn hekk Zidane għen lil Real jirbħu ħames trofej maġġuri fl-istaġun li għadda filwaqt li l-kowċ ta’ Liverpool Jurgen Klopp irid itemm tradizzjoni negattiva fil-finali ta’ kompetizzjonijiet maġġuri.
Klopp, li fil-passat kien imexxi lit-tim Ġermaniż ta’ Borussia Dortmund tilef ħames finali minn sitta li ħa sehem fihom. Minn dawn il-ħamsa tnejn minnhom tilifhom ma’ Liverpool u b’hekk se jkun qed ifittex l-ewwel suċċess tiegħu bħala kowċ ta’ Liverpool wara li fl-2012 kien rebaħ it-tazza domestika ma’ Dortmund.
Dan l-istaġun kien wieħed negattiv għal Real ikkumparat mal-istaġun li għadda imma bla dubju dawn jistgħu jtemmu bl-aqwa mod jekk jirbħu kontra Liverpool.
Minn naħa tagħhom Liverpool jistgħu jitqiesu bħala sorpriża fil-finali u issa la waslu s’hawn se jippruvaw itemmu d-dominju Madrilen f’din il-kompetizzjoni.
Ta’ min jiftakar li min jirbaħ illejla jikkontesta l-finali tal-UEFA Super Cup li se tintlagħab fil-15 ta’ Awwissu kontra Atletico Madrid, rebbieħa tal-Europa League.
Dan ifisser li f’każ li jkunu Real li jirbħu, l-partita f’Talinn fl-Estonja tkun ripetizzjoni tal-finali taċ-Champions League ta’ sentejn ilu u tal-2014. Fl-2016, f’San Siro Real rebħu bil-penalties filwaqt li sentejn qabel, fil-Portugall, kienu rebħu kontra t-tim ta’ Diego Simeone fil-ħin barrani.
