R.MADRID………………..3
LIVERPOOL…………….1
Real Madrid huma għal darba oħra ċ-Champions tal-Ewropa. Dan wara li huma għelbu lil Liverpool bi skor ta’ 3-1 fil-finali fi Kiev fl-Ukrajna biex b’hekk mhux biss iddefendew it-titlu imma rebħu l-kompetizzjoni għat-tielet darba konsekuttiva. Din hi t-13-il darba li Real rebħu t-tazza filwaqt li fl-istess ħin ċaħħdu lil Liverpool milli jirbuħa għas-sitt darba. B’din ir-rebħa Real pattew anke għat-telfa li kienu sofrew fil-finali ta’ din il-kompetizzjoni lura fl-1981 kontra l-istess Liverpool. Għal dawn tal-aħħar, din kienet it-tielet darba li tilfu l-finali taċ-Champions League.
Din hi t-tieni darba fl-istorja ta’ Real Madrid li dawn rebħu t-titlu tliet darbiet wara xulxin (kienu rebħu t-tazza ħames darbiet infila bejn l-1956 u l-1960) u huma t-tielet tim li għamel dan ir-rekord (Bayern Munich u Ajax iż-żewġ timijiet l-oħra).
B’dan is-suċċess il-kowċ ta’ Real Madrid Zinedine Zidane sar l-ewwel kowċ fl-istorja li qatt rebaħ din it-tazza tliet darbiet wara xulxin filwaqt li fuq in-naħa l-oħra kompliet it-tradizzjoni negattiva tal-manager ta’ Liverpool Jurgen Klopp li f’finali ta’ kompetizzjonijiet maġġuri.
Minn seba’ finali li kien involut fihom, Klopp, eksmanager ta’ Borussia Dortmund, rebaħ biss waħda.
B’din ir-rebħa Real pattew ukoll għad-diżappunt tal-istaġun wara li kellhom jaraw lir-rivali tagħhom Barcelona jirbħu l-kampjonat u anke t-tazza tar-Re. Staġun ilu Real kienu rebħu ħames trofej maġġuri imma din is-sena kienet waħda ferm diffiċli għalihom imma temmew l-istaġun bl-aħjar mod possibbli.
Il-logħba kienet waħda bilanċjata fl-ewwel taqsima u fit-tieni taqsima splodiet u rajna erba’ gowls, tnejn minnhom ta’ Gareth Bale li kien daħal bħala sostitut. Hu hawn fejn wieħed jinnota d-differenza li hemm bejn dawn iż-żewġ timijiet. Zidane daħħal plejer li f’temp ta’ ftit minuti dawwar il-logħba filwaqt li Liverpool, li tilfu lil Salah fl-ewwel taqsima minħabba injury, ma baqgħux effettivi bl-inklużjoni ta’ plejer ieħor minfloku.
Fl-ewwel taqsima kienu Liverpool li ħarġu l-aktar aggressivi u l-ewwel ċans kbir tagħhom wasal fit-23 minuta meta Alexander-Arnold ra x-xutt tiegħu jkun salvat mill-gowlkiper Navas. Tliet minuti wara l-partita ħadet żvolta hekk kif fi dwell bejn Salah u Ramos, l-attakkant Eġizzjan waqa’ fuq spalltu u tant kemm mien muġugħ li ma setax ikomppli l-logħba u minfloku daħal Lallana.
Donnu wara dan l-episodju Real għamlu kuraġġ ladarba l-avversarji tagħhom tilfu pedina daqstant importanti u bdew jippressaw aktar.
Fit-43 minuta huma kellhom gowl imħassar għal offside. Dan meta Ronaldo l-ewwel ra d-daqqa ta’ ras tiegħu salvata b’mod stupend minn Karius u mir-rebound Benzema tefa’ l-ballun fix-xibka imma kien f’pożizzjoni ta’ offside mad-daqqa ta’ ras ta’ Ronaldo.
Eżatt qabel tmiem l-ewwel taqsima l-Ispanjoli għalqu fuq l-attakk meta minn cross ta’ Benzema, Nacho kellu x-xutt tiegħu li mar barra biex b’hekk l-iskor baqa’ 0-0.
It-tieni taqsima kienet waħda mimlija emozzjoni u hekk kif bdiet Isco ta’ Real kien sfortunat li laqat il-lasta. Kien fil-51 minuta meta wasal l-ewwel gowl tal-logħba u dan wasal b’mod ferm banali. Il-gowlkiper ta’ Liverpool Karius ġabar ballun u mal-ewwel mar biex itih lil sieħbu li kien viċin imma kien aljenat u BENZEMA mattajr saqajh u ddevvja l-ballun fix-xibka.
Għaddew biss erba’ minuti u waslet ir-reazzjoni ta’ Liverpoo li minn azzjoni ta’ corner Lovren għola tajjeb u niżżel il-ballun lejn MANE li laħaq qabel Marcelo u ġab id-draw.
Fit-63 minuta, żewġ minuti wara li kien għadu daħal minflok Isco, Gareth BALE reġa’ poġġa lil Real Madrid fil-vantaġġ b’gowl spettakolari li żgur ha jibqa’ bħala wieħed mill-aqwa tal-finali ta’ din il-kompetizzjoni. Minn hawn ‘il quddiem Real kienu fil-kontroll għalkemm fil-71 minuta Liverpool laqtu l-lasta permezz ta’ Mane.
Sitt minuti mit-tmiem l-eksplejer ta’ Tottenham li jaf sew lil Liverpool, BALE reġa’ sab ix-xibka din id-darba b’xutt b’saħħtu minn barra l-kaxxa bil-gowlkiper Karius ma jsalvax tajjeb.
Ta’ min jinnota li issa grazzi għal din ir-rebħa Real kisbu d-dritt li jilagħbu l-finali tal-UEFA Super Cup fil-15 ta’ Awwissju fl-Estonaj kontra Atletico Madrid, li huma rebbieħa tal-Europa League. Din se tkun ripetizzjoni tal-finali taċ-Champions League tal-2014 meta dakinhar Real kienu rebħu bil-penalties f’San Siro kontra t-tim ta’ Diego Simeone.
Fil-fatt, din hi l-ewwel darba sa mill-1994 li żewġ timijiet mill-istess belt rebħu żewġ kompetizzjonijiet maġġuri tal-UEFA. Fl-1994 Milan kienu rebħu ċ-Champions League filwaqt li Inter kienu rebħu l-UEFA Cup.
Barra minn hekk Real Madrid issa jilagħbu anke fit-Tazza tad-Dinja tal-Klabbs li ssir f’Diċembru u se jippruvaw jiddefendu t-titlu li rebħu sena ilu.
