Id-debutt ta’ Roberto Mancini bħala kowċ nazzjonali tal-Italja kien wieħed pożittiv hekk kif l-Italja kisbet rebħa ta’ 2-1 kontra s-Sawdja Arabja, tim li għall-kuntrarju tal-Italja, ftit ġimgħat oħra, se jkun qed jilgħab fit-Tazza tad-Dinja.
It-Taljani marru fil-vantaġġ b’gowl mill-isbaħ ta’ Mario Balotelli li kien qed jilbes il-flokk ta’ pajjiżu wara nuqqas ta’ erba’ snin. Balotelli sab ix-xibka b’xutt mill-isbaħ minn barra l-kaxxa wara li evita xi difensuri.
Fis-70 minuta Balotelli ġie mibdul minħabba xi uġiegħ u l-plejer li daħal minfloku, Belotti skurja minn rebound wara li ra daqqa ta’ ras tiegħu stess salvata.
Żewġ minuti wara l-Arabja Sawdija naqqsu d-distakk b’gowl ta’ Al Shehri.
