Id-debutt ta’ Ray “Żażu” Farrugia bħala kowċ tat-tim nazzjonali Malti kien wieħed pożittiv hekk kif Malta kisbet draw ta’ 1-1 kontra l-Armenja f’partita ta’ ħbiberija li ntlagħbet fl-Awstrija.
Bħalissa l-Maltin qegħdin l-Awstrija għal kamp ta’ taħriġ u nhar il-Ġimgħa se jilagħbu logħba oħra ta’ ħbiberija, dik kontra Ġorġja.
Farrugia ħa post l-ekskowċ Tom Saintfiet li kien tkeċċa wara li sar magħruf li hu kien applika biex imexxi lit-tim nazzjonali tal-Kamerun meta kien għadu marbut b’kuntratt mal-MFA.
Matul il-partita għamlu d-debutt tagħhom erba’ plejers b’Ferdinando Apap jilgħab il-logħba kollha. It-tliet plejers l-oħra li għamlu d-debutt kienu Kyrian Nwoko, Jake Grech u Jurgen Degabriele.
L-Armeni marru fil-vantaġġ meta fit-13-il minuta YAGAN irċieva ballun mingħand il-playmaker ta’ Arsenal Henrikh Mkhitaryan, daħal fil-kaxxa u għeleb lil Hogg b’xutt fil-baxx. Eżatt qabel tmiem l-ewwel taqsima Malta ngħataw penalty wara li Varazdat Haroyan imblokka xutt ta’ Joseph Zerafa b’idu fil-kaxxa u mill-11-il metru Andre AGIUS ma żbaljax biex għamel l-iskor 1-1.
Fis-77 minuta l-Armenja spiċċaw jilagħbu b’10 meta tkeċċa Haroyan imma l-Maltin ma għarfux japprofittaw mill-vantaġġ numeriku.
Dan id-draw jista’ jitqies bħala wieħed ferm pożittiv anke meta wieħed iqis li t-tim Malti kien nieqes minn diversi plejers li kienu mweġġgħin.
Dan il-kamp ta’ taħriġ qed servi bi preparazzjoni għall-partiti li t-tim Malti għandu fil-UEFA Nations League bejn Settembru u Novembru li ġej.
