Il-plejer internazzjonali Malti Rachel Cuschieri ffirmat kuntratt ta’ sentejn mat-tim Olandiż ta’ PSV. B’hekk, l-esperjenza ta’ Cuschieri barra minn pajjiżna se tkompli hekk kif matul l-istaġun li għadda hi kienet qed tilgħab fil-Belġju ma’ Anderlecht.
Sfortunatament għaliha, fi Frar li għadda kien sar magħruf li hi kienet se tilef il-kumplament tal-istaġun wara li weġġgħet il-qasba ta’ sieqha f’sessjoni ta’ taħriġ.
Qabel l-avventura ma’ Anderlecht, Cuschieri kienet ilha tilgħab ma’ Apollon Limassol fil-kampjonat Ċiprijott sa mill-2014, wara li f’pajjiżna lagħbet fil-kampjonat tan-nisa ma’ Birkirkara fejn fost l-unuri li rebħet, rebħet tliet darbiet il-kampjonat mat-tim Karkariż.
