Kontra kull mistenni Zinedine Zidane ħabbar li mhux se jibqa’ jmexxi lil Real Madrid. Nhar is-Sibt li għadda Real Madrid rebħu ċ-Champions League u Zidane kien għadu kemm sar l-ewwel kowċ fl-istorja li qatt rebaħ it-tazza tliet darbiet wara xulxin.
Barra minn hekk, Zidane, sa minn meta beda jmexxi lill-Merengues fl-2016 kiseb suċċess kbir hekk kif rebaħ anke darbtejn it-Tazza tad-Dinja tal-Klabbs, darbtejn il-UEFA Super Cup, is-Super Cup Spanjola u l-kampjonat Spanjol.
Fil-kummenti tiegħu Zidane qal li biex Real jibqgħu jirbħu hemm bżonn li jkun hemm bidla u kien għalhekk li hu se jħalli l-kariga ta’ kowċ taċ-Champions Ewropej.
B’hekk, issa Real se jibdew ifittxu kowċ li jista’ saħanistra jirbaħ l-ewwel unur mat-tim il-ġdid tiegħu fil-15 ta’ Awwissu meta dakinhar Real jilagħbu l-finali tal-UEFA Super Cup fil-belt ta’ Talinn fl-Estonja kontra Atletico Madrid, rebbieħa tal-Europa League.
