Il-kowċ tat-tim nazzjonali Malti Ray Żażu Farrugia kien sodisfatt bil-prestazzjoni tat-tim nazzjonali fid-draw ta’ 1-1 kontra l-Armenja fl-Awstrija, f’dik li kienet l-ewwel logħba tiegħu fit-tmexxija tat-tim nazzjonali.
Farrugia qal wara l-logħba qal li l-plejers Maltin urew il-kwalitajiet tagħhom u niżlu fil-grawnd b’attitudni pożittiva. Hu qal li bħala l-ewwel logħba hu sodifatt iżda kompla jgħid li kulħadd irid iżomm saqajh mal-art għax dan għadu biss il-bidu u baqa’ ħafna xogħol xi jsir.
Minkejja bidu diffiċli fl-Awstrija fejn l-Armeni marru kmieni fil-vantaġġ, il-Maltin immexxija minn Farrugia u l-assistant tiegħu Branko Nisevic, kellhom reazzjoni tajba u kisbu draw meritat b’penalty qabel l-intervall.
L-azzjoni tal-penalty waslet minn injizjattiva ta’ Joseph Zerafa li x-xutt tiegħu kien imblukkat minn id difensur Armen u mill-11-il metru kien Andrei Agius li spara fix-xibka.
Il-logħba kontra l-Armenja minbarra d-debutt ta’ Ray Farrugia fit-tnmexxija tat-tim, rat ukoll id-debutt ta’ erba’ plejers. Dawn huma Ferdinando Apap, Joseph Mbong, Jurgen Degabriele u Jake Grech. Farrugia saħaq li dan hu l-pjan tiegħu li jħallat l-esperjenza tal-plejers veteran u stabbiliti bħal ta’ Michael Mifsud, Rodrick Briffa u Andrew Cohen, ma’ dawk ġodda li b’hekk ikunu jistgħu jiksbu l-esperjenza tant meħtieġa għall-impenji li jmiss fil-kompetizzjoni ġdida tal-UEFA Nations League.
It-tim nazzjonali Malti issa jerġa’ jkun fl-azzjoni għada kontra Georgia, logħba li tibda fis-7pm u se tintlagħab fi Schwaz fl-Awstrija.
