F’waħda minn diversi partiti ta’ ħbiberija Franza uriet li hi ferm b’saħħitha għall-Italja meta b’wirja dominanti rebħitilha bi skor ta’ 3-1. Il-Franċiżi jinsabu għaddejin bl-aħħar preparamenti qabel it-Tazza tad-Dinja filwaqt li għall-Italja din kienet it-tieni logħba taħt it-tmexxija tal-kowċ il-ġdid Roberto Mancini li kien iddebutta ftit jiem ilu bir-rebħa kontra l-Arabja Sawdita.
Wara biss tmien minuti Franza fetħu l-iskor b’gowl ta’ UMTITI li skurja minn rebound wara li l-gowlkiper Sirigu salva xutt ta’ Mbappe.
Fid-29 minuta l-Franċiżi ngħataw penalty meta Madragora, li kien qed jagħmel id-debutt tiegħu fil-flokk Taljan, waqqaż lil Hernandez fil-kaxxa u mill-11-il metru GRIEZMANN ma żbaljax biex għamel l-iskor 2-0.
Kien biss fit-36 minuta meta waslet reazzjoni tal-Italja hekk kif minn free kick indirizzat minn Balotelli, BONUCCI skurja minn rebound wara li Lloris kien salva temporanjament.
Fit-tieni taqsima Franza żiedu ieħor b’gowl mill-isbaħ ta’ DEMBELE li skurja b’xutt bid-dawra għal skor finali ta’ 3-1. Dan ir-riżultat ifisser li l-Italja ilha 10 snin ma tegħleb lil Franza bl=aħħar suċċess Taljan ikun dak ta’ 2-0 fil-Kampjonat Ewropew tal-2008.
