MALTA …………….0
ĠORĠJA ………..1
Fit-tieni partita ta’ ħbiberija fi spazju ta’ tlett ijem, it-tim nazzjonali Malti reġa’ kellu wirja pożittiva imma kien ikkastigat minn penalty fid-90 minuta biex sofra telfa minima ta’ 1-0 kontra Ġorġja. Madankollu ta’ min jgħid li dawn tal-aħħar lagħbu bi plejer inqas għal kważi 40 minuta.
Il-Maltin kienu għadhom ġejjin minn draw ta’ 1-1 kontra l-Armenja fl-ewwel logħba tagħhom taħt it-tmexxija tal-kowċ il-ġdid Ray Farrugia.
Bħal fil-partita kontra l-Armenja, il-Maltin kellhom wirja qalbiena u offrew sfida denja lill-avversarji tagħhom xi ftit aktar ikkwotati minnhom, iżda kienu sfortunati meta kellhom ibaxxu rashom fl-aħħar sekondi tal-partita.
Il-kowċ Malti għamel erba’ bidliet mit-tim li kiseb draw kontra l-Armenja nhar it-Tlieta li għadda. Dan hekk kif bejn il-lasti beda l-gowlkiper Henry Bonello minflok Andrew Hogg, Ryan Camileri li rkupra minn injury żgħira ħa post l-Għawdxi Ferdinando Apap, Joseph Mbong beda fil-formazzjoni inizjali għall-ewwel darba fil-post ta’ Steve Pisani filwaqt li Myles Beerman beda minflok Kyrian Nwoko.
Din il-logħba ta’ ħbiberija ġabet fi tmiemu training camp ta’ sebat ijiem fl-Awstrija li ġie organizzat bi tħejjija għall-UEFA Nations League li se tibda f’Settembru li ġej, bl-avversarji tal-Maltin se jkunu l-Azerbaijan, Faroe Islands u l-Kosovo.
Kienu l-Maltin li ħolqu l-ewwel periklu li wasal wara biss tliet minuti meta l-midfielder, Roderick Briffa, ipprova japprofitta mill-fatt li l-gowlkiper tal-Ġorġja, Roini Kvaskhvadze, inqabad barra minn postu u ttanta xortih permezz ta’ xutt mid-distanza li iżda spiċċa għoli.
Ġorġja rrispondew żewġ minuti biss wara meta Lasha Dvali indirizza cross lejn Otar Kiteishvili li għola tajjeb iżda ra d-daqqa ta’ ras tiegħu mill-viċin tintemm ċentimetri barra mil-lasti.
Huma komplew jattakkaw u fis-seba’ minuta xutt angolat fil-baxx ta’ Budu Zivzivadze ġie salvat minn Henry Bonello.
L-avversarji, fis-16-il minuta, tilfu ċans tad-deheb li jiftħu l-iskor meta free-kick insidjuż ta’ Zivzivadze stampa mal-mimduda qabel niżel fuq il-linja fatali, bid-difiża Maltija tkun pronta u tikklerja l-ballun ‘il bogħod minn kull periklu.
Żewġ minuti biss wara, Ġorġja setgħu fetħu l-iskor meta l-iżmarkat, Saba Lobjanidze, għamel l-impossibbli minn pożizzjoni ideali.
Tmien minuti mill-ftuħ tat-tieni taqsima, Ġorġja spiċċaw jilagħbu b’10 plejers meta tkeċċa Valeriane Gvilia għal żewġ karti sofor.
Kien hawn fejn il-Maltin wettqu reazzjoni u Myles Beerman indirizza free-kick insidjuż biex il-ballun wasal għand Ryan Camilleri li minn taħt il-lasti ra lill-gowlkiper Roini Kvaskhvadze idawwar f’corner.
Il-partita baqgħet bilanċjata u meta kollox deher li kienet se tispiċċa fi draw, Ġorġja rebħu penalty meta Steve Borg waqqa’ lil Otar Kiteishvili fil-kaxxa, biex mill-11-il metru GURAM KASHIA b’xutt qawwi xeħet il-ballun fir-rokna tax-xibka.
