Illum ġiet organizzata t-tmien edizzjoni tat-Teamsport Goalkeeper Battle. Din l-attività, bħal kull sena,ġiet organizzata mill-eksgowlkiper internazzjonali Malti, Mario Muscat, l-eksgowlkiper Simon Grech kif ukoll Mario Bonello li hu l-fundatur tal-fondazzjoni Żemżem.
L-edizzjoni ta’ din is-sena saret fil-Luxol Stadium. B’kollox kien hemm tmien kategoriji li jvarjaw minn gowlkipers taħt id-disa’ snin sal-kategorija tal-kbar.
Din is-sena reġa’ kien hemm ukoll kategorija għall-gowlkipers nisa. It-Teamsport Goalkeeper Battle hi kompetizzjoni li tgħin lill-gowlkipers kollha minn disa’ snin ’il fuq biex itejbu l-ħiliet tagħhom u jieħdu gost waqt li jilagħbu l-isport favorit tagħhom.
Madwar 200 gowlkeeper ħadu sehem fl-edizzjoni ta’ din is-sena, edizzjoni li għaliha kien hemm preżenti wkoll il-kelliem tal-Oppożizzjoni dwar l-Isport Ryan Callus.
Permezz ta’ din l-edizzjoni, bħal ma għamlu fl-aħħar edizzjonijiet, l-organizzaturi għenu lill-Fondazzjoni Żemżem, li hi organizzazzjoni volontarja reġistrata biex tgħin lit-tfal u adulti li qed jingħataw trattament għall-marda tal-lewkemija.
