F’waħda minn diversi partiti ta’ ħbiberija qabel il-bidu tat-Tazza tad-Dinja l-Ingilterra kisbet rebħa ta’ 2-1 f’Wembley kontra n-Niġerja. Fl-ewwel taqsima l-Ingliżi ddominaw imma fit-tieni taqsima naqqsu mir-ritmu.
Wara biss seba’ minuti l-Ingilterra marru fil-vantaġġ minn azzjoni ta’ corner. Kien id-difensur ta’ Chelsea Gary CAHILL li skurja b’daqqa ta’ ras. Ma waslet l-ebda reazzjoni tan-Niġerja u ħames minuti qabel tmiem l-ewwel taqsima kien il-captain Harry KANE li droppja b’xutt minn barra.
Għal Kane, li sena ilu ġie vvutat l-aqwa plejer tal-Ingliżi, dan kien it-tmien gowl fl-aħħar seba’ logħbiet mat-tim nazzjonali.
Hekk kif bdiet it-tieni taqsima n-Niġerja naqqsu d-distakk b’gowl ta’ IWOBI li skurja minn rebound wara li Ighalo kien laqat il-lasta. Il-logħba li jmisshom l-Ingliżi issa hi fis-7 ta’ Ġunju meta dakinhar jilagħbu kontra l-Costa Rica.
Kontra kull mistenni, l-Ġermanja, champions tad-dinja, tilfu 2-1 kontra l-Awstrija. Kienu l-Ġermaniżi li marru fil-vantaġġ wara 11-il minuta u kien OZIL li qabbeż il-ballun minn fuq il-gowlkiper.
Fit-tieni taqsima l-andament tal-logħba nbidel u fit-53 minuta l-Awstrija ġabu d-draw. HINTEREGGER skurja ġmiel ta’ gowl b’volley mill-isbaħ.
L-Awstrijaċi komplew jagħfsu u 20 minuta mit-tmiem marru għall-ewwel darba fil-vantaġġ. Din id-darba kien SCHOPF li skurja mill-viċin wara li rċieva mingħand Lainer. Din kienet l-ewwel telfa tal-Ġermanja kontra l-Awstrija f’dawn l-aħħar 32 sena. Barra minn hekk, issa l-Ġermaniżi ilhom ħames partiti bla rebħa. L-aħħar li rebħu kien f’Ottubru kontra l-Ażerbajġan.
Ta’ min jinnota li ritorn importanti bejn il-lasti tal-Ġermanja kien dak tal-gowlkiper Manuel Neuer. Dan tal-aħħar tilef kważi l-istaġun kollu wara li kien weġġa’ u ġie operat f’Settembru li għadda. Il-Ġermanja issa jerġgħu jkunu fl-azzjoni nhar il-Ġimgħa kontra l-Arabja Sawdija.
F’partita ta’ lussu bejn il-Belġju l-Portugall l-iskor baqa’ dak ta’ 0-0. Il-logħba kienet waħda bilanċjata u bla dubju l-akbar aħbar hi li d-difensur tal-Belġju Vincent Kompany weġġa’ u kellu jkun mibdul fit-tieni taqsima. Wieħed irid jara jekk dan hux se jirkupra għat-Tazza tad-Dinja.
