Waqt konferenza stampa li saret fir-Ranges Nazzjonali f’Ta’ Kandja ingħataw l-aħħar dettalji dwar it-Tazza tad-Dinja tal-isparar li se jsir f’pajjiżna l-ġimgħa d-dieħla bejn is-6 u l-14 ta’ Ġunju.
Salvu Portelli President tal-Federazzjoni Maltija tal-Isparar spjega kif kull sena l-ISSF torganizza erba’ avvenimenti tat-Tazza tad-Dinja fejn din hi l-ewwel darba li Malta se tkun qed tospita tappa mit-Tazza tad-Dinja u dan hu unur kbir mhux biss għall-Federazzjoni Maltija iżda wkoll għal Malta.
Portelli kkonferma li f’din l-edizzjoni se jieħdu sehem 374 tiratur li se jkunu ġejjin minn madwar 60 pajjiż.
Preżenti wkoll għall-konferenza tal-aħbarijiet fir-Ranges il-ġodda kien hemm is-Segretarju Parlamentari responsabbli miż-Żgħażagħ Sport u Għaqdiet tal-Volontarjat Clifton Grima li awguri lill-Federazzjoni Maltija fl-organizazzjoni ta’ dan l-avveniment u awgura lill-11-il atleta Malti li se jkunu qed jirrapreżentaw lill-pajjiżna.
L-atleti Maltin li se jikkompetu f’din l-edizzjoni tat-Tazza tad-Dinja 2018 tal-ISFF huma Marcello Attard (Skeet), Marlon Attard (Skeet), Jason Sciberras (Skeet), Darren Vella (Skeet), Bozhidar Dimitrov (Skeet), Nazzareno Attard (Trap), Mario Buhagiar (Trap), Gianluca Chetcuti (Trap), William Chetcuti (Trap), Brian Galea (Trap) u Mikaela Galea (Trap).
