Il-klabb tal-Ewwel Diviżjoni Otters ikkonferma l-akkwist ta’ Miklos Gor-Nagy bħala l-barrani tal-klabb għall-Kampjonat tas-sajf. L-Ungeriż li għandu 35 sena lagħab ħafna mill-karriera f’pajjiżu.
Fost l-unuri li rebaħ, Gor-Nagy rebaħ darbtejn il-Kampjonat Ungeriż ma’ ZF Eger fl-2013 u fl-2014 u darbtejn it-Tazza Ungeriża fl-2003 ma’ BVSC u fl-2010 ma’ Honved, żewġ klabbs li magħhom rebaħ ukoll is-Super Cup Ungeriża. Fil-Montenegro hu rebaħ it-Tazza tal-pajjiż fl-2008 ma’ Budva.
Gor-Nagy lagħab għal diversi snin mat-tim nazzjonali Ungeriż bl-aktar esperjenza li tispikka tkun ir-rebħ tal-Kampjonat tad-Dinja fl-2013 f’Barcelona, u fl-2001 kien parti mit-tim nazzjonali li rebaħ il-Kampjonat Ewropew taż-Żgħażagħ.
