Raġel weġġa’ gravi wara li għal raġuni tilef kontroll tal-mutur li kien qed isuq fil-Marsa. L-inċident seħħ ilbieraħ filgħaxija ftit wara s-7:30pm fi Triq Aldo Moro.
Ir-raġel hu Belġjan ta’ 51 sena li jgħix Marsaskala. Flimkien miegħu kien hemm mara Belġjana tal-istess età.
Il-Belġjan ittieħed l-isptar Mater Dei għall-kura, fejn iktar tard kien iċċertifikat li jinsab fil-periklu tal-mewt, filwaqt li l-mara weġgħet ħafif.
Hu kien qed isuq mutur tat-tip Piaggio.
Intant, ilbieraħ ukoll, raġel ta’ 26 sena jinsab fil-periklu tal-mewt wara li ttajjar f’Tal-Pietà.
L-inċidenti seħħ għall-ħabta tal-10.35pm fi Triq l-Indipendenza.
Ir-raġel, li huwa barrani u jgħix l-Imsida, intlaqat minn vann Isuzu Dmax misjuq minn raġel ta’ 26 sena miż-Żurrieq.
Fiż-żewġ każi, infetħu nkjesti mmexxija mill-Maġistrat Grazio Mercieca.
