Ilbieraħ, għall-ħabta tas-6:00PM waslet lura Malta l-kantanta żagħżugħa Maltija Emma Muscat. Il-kantanta ta’ 18-il sena rritornat lura Malta wara 6 xhur avventura fil-programm televiżiv Taljan tant imsegwi minn bosta Maltin, Amici.
Qabel ma ħarġet mill-Ajruport Internazzjonali ta’ Malta fejn kien hemm ħafna nies jistennewha sabiex jifirħulha għas-suċċess li kisbet, Emma kellha l-opportunità li tindirizza lill-ġurnalisti lokali u spjegat kif il-programm Amici taha esperjenza mill-isbaħ mill-bidu sat-tmiem. Hi żiedet tgħid li minkejja li m’għaddietx għall-finali, hi xorta waħda kuntenta għaliex din kienet l-isbaħ esperjenza ta’ ħajjitha s’issa.
F’dan il-filmat li hu twil ftit iktar minn żewġ minuti, ġbarna l-iktar mumenti sbieħ tal-wasla ta’ Emma fejn issemmi wkoll x’kienu dawk l-iktar affarijiet li ħasset in-nuqqas tagħhom waqt l-esperjenza tagħha barra minn Malta.
