L-attakkant Żvediż Zlatan Ibrahimovic mhux qed jittama li pajjiżu jirbaħ it-Tazza tad-Dinja.
F’kummenti iebsa fil-konfront tal-midja tal-Iżvezja, Ibrahimovic attakka l-mentalità tal-ġurnalisti u qal li issa ladarba t-tim se jkun mingħajru ikun aħjar jekk it-Tazza tad-Dinja jirbaħha tim ieħor.
Ibrahimovic kien irtira minn man-nazzjonal wara li ntemm il-Kampjonat Ewropew tal-2016 u xaharejn ilu mar jilgħab l-Istati Uniti ma’ LA Galaxy.
Minn dakinhar ‘l hawn beda jagħti x’jifhem li jista’ jirritorna mat-tim nazzjonali biex jilgħab fit-Tazza tad-Dinja imma l-kowċ nazzjonali Janne Andersson kien dejjem tal-fehma li l-plejers li lagħbu fil-fażi ta’ kwalifikazzjoni għat-Tazza tad-Dinja biss jixirqilhom li jkunu fit-tim li se jikkompeti fir-Russja.
L-Iżvezja għaddiet għat-Tazza tad-Dinja wara li rebħet play-off fuq żewġ legs kontra l-Italja.
“Nittama li l-Brażil jirbħu t-Tazza tad-Dinja. Issa l-midja Żvedida qed tgħid li l-logħob tat-tim nazzjonali hu aktar kollettiv ladarba m’hemmx jien u b’hekk nistenna li l-Iżvezja tirbaħ it-Tazza tad-Dinja,” qal Ibrahimovic b’ton ironiku.
“Jien m’għandix isem tipiku Żvediż u lanqas l-imġieba tipika tal-Iżvediżi u forsi hu għalhekk li ġejt eskluż, anke jekk għandi diversi rekords f’idi. It-Tazza tad-Dinja hi l-akbar festa ta’ sport u fiha jieħdu sehem l-aqwa plejers u l-uniku wieħed nieqes hu jien.”
Ibrahimovic hu l-aqwa skorer ta’ pajjiżu bi 62 gowl f’116-logħba. Ibrahimovic temm billi qal li filwaqt li l-midja Żvediża qalet li t-tim nazzjonali jaf isfori jekk il-plejers ikollhom jilagħbu għalih imma hu fakkar li matul il-karriera tiegħu rebaħ ma’ kull tim li lagħab miegħu u bla dubju ma kienx jirbaħ li kieku ma kienx jaf jilgħab bħala parti minn tim.
